میرپورماتھیلو (باغی ٹی وی/نامہ نگار مشتاق علی لغاری)ڈی آئی جی سکھر لاڑکانہ رینج ناصر آفتاب کی کمانڈ میں ڈاکوؤں کے خلاف جاری آپریشن کے دوران بڑی کامیابی حاصل ہوئی ہے۔ سکھر رینج پولیس، سندھ رینجرز اور وفاقی سول انٹیلیجنس ایجنسی کی مشترکہ کارروائی میں نجی ٹی وی کے صحافی محمد بچل گھنیوں کے قتل میں ملوث دو مرکزی ملزمان نے پولیس پریشر کے باعث خود کو قانون کے حوالے کر دیا۔
ایس ایس پی گھوٹکی محمد انور کھیتران نے ڈی ایس پی آفس اوباڑو میں پریس کانفرنس کرتے ہوئے بتایا کہ ڈیڑھ سال قبل بے دردی سے قتل کیے گئے صحافی محمد بچل گھنیوں کے کیس میں مرکزی ملزمان غلام حسین ولد جام گھنیوں اور قدیر ولد خان محمد گھنیوں نے جاری آپریشن کے دباؤ پر گرفتاری پیش کی۔
ایس ایس پی کے مطابق اس سے قبل بھی دو ملزمان کو گرفتار کیا جا چکا ہے، جبکہ قتل کیس میں مجموعی طور پر سات ملزمان نامزد ہیں، جن میں سے چار کو گرفتار کر لیا گیا ہے اور باقی ملزمان کو بھی جلد قانون کی گرفت میں لے لیا جائے گا۔
محمد انور کھیتران نے کہا کہ پولیس صحافیوں کے تحفظ کے لیے ہر ممکن اقدامات کر رہی ہے اور صحافیوں کو مکمل سیکیورٹی فراہم کرنا پولیس کی ذمہ داری ہے۔ انہوں نے واضح کیا کہ ملزمان چاہے کتنے ہی بااثر کیوں نہ ہوں، قانون کی گرفت سے نہیں بچ سکتے۔
ایس ایس پی گھوٹکی نے مزید کہا کہ ڈاکوؤں کے خلاف ٹارگیٹڈ آپریشن اس وقت تک جاری رہے گا جب تک تمام ملزمان گرفتار یا سرنڈر نہیں کر لیتے۔