حکومت کا پاکستان اسٹیل ملز کی بحالی کا اعلان

وزیراعظم کے معاونِ خصوصی برائے صنعت و پیداوار ہارون اختر نے پاکستان اسٹیل ملز کی بحالی کا باضابطہ اعلان کرتے ہوئے کہا ہے کہ حکومت قومی صنعتی اداروں کو دوبارہ فعال بنانے کے لیے سنجیدہ اور عملی اقدامات کر رہی ہے، تاکہ ملکی معیشت کو مضبوط بنیادوں پر استوار کیا جا سکے۔

اسلام آباد میں میڈیا کو بریفنگ دیتے ہوئے ہارون اختر نے بتایا کہ پاکستان اسٹیل ملز کی بحالی حکومت کی ترجیحات میں شامل ہے اور اس مقصد کے لیے مختلف آپشنز پر کام جاری ہے۔ ان کا کہنا تھا کہ اسٹیل ملز میں سرمایہ کاری کے لیے صرف روس ہی نہیں بلکہ چار مختلف بین الاقوامی پارٹیز نے دلچسپی ظاہر کی ہے، جن کے ساتھ مشاورت اور ابتدائی بات چیت کا عمل جاری ہے۔ انہوں نے واضح کیا کہ حکومت شفافیت اور قومی مفاد کو سامنے رکھتے ہوئے فیصلہ کرے گی۔ہارون اختر نے کہا کہ اسٹیل ملز کی بحالی سے نہ صرف صنعتی پیداوار میں اضافہ ہوگا بلکہ ہزاروں افراد کے لیے روزگار کے نئے مواقع بھی پیدا ہوں گے۔ ان کے مطابق بند پڑے صنعتی یونٹس کو دوبارہ چلانا حکومت کی صنعتی پالیسی کا اہم حصہ ہے۔

میڈیا بریفنگ کے دوران معاونِ خصوصی نے اعلان کیا کہ حکومت جلد نیو انرجی وہیکل (NEV) پالیسی متعارف کرانے جا رہی ہے، جس کا مقصد ماحول دوست گاڑیوں کے فروغ کے ساتھ ساتھ مقامی آٹو انڈسٹری کو جدید خطوط پر استوار کرنا ہے۔ انہوں نے کہا کہ اس پالیسی کے تحت الیکٹرک اور ہائبرڈ گاڑیوں کی تیاری اور استعمال کو فروغ دیا جائے گا۔ہارون اختر نے مزید بتایا کہ حکومت ویکسین پالیسی اور سولر پالیسی بھی لا رہی ہے، تاکہ صحت اور توانائی کے شعبوں میں خود کفالت حاصل کی جا سکے۔ ان کا کہنا تھا کہ سولر انرجی کے فروغ سے نہ صرف بجلی کے بحران پر قابو پانے میں مدد ملے گی بلکہ صنعتی لاگت میں بھی کمی آئے گی۔انہوں نے کہا کہ حکومت پیداواری شعبے کی ترقی پر خصوصی توجہ دے رہی ہے اور اسی سلسلے میں یہ بھی غور کیا جا رہا ہے کہ ہوم اپلائنسز کی تیاری پاکستان میں ہی کی جائے، تاکہ درآمدات پر انحصار کم ہو اور مقامی صنعت کو فروغ ملے۔