وفاقی حکومت نے بڑھتی ہوئی پیٹرولیم قیمتوں کے اثرات کم کرنے کے لیے موٹر سائیکل اور رکشہ سواروں کو ریلیف دینے کی غرض سے ٹارگٹڈ سبسڈی اسکیم پر کام شروع کر دیا ہے۔ اس مجوزہ منصوبے کے تحت عام آدمی، خصوصاً کم آمدن والے طبقے کو براہ راست فائدہ پہنچانے کی کوشش کی جا رہی ہے۔
ذرائع کے مطابق حکومت اس اسکیم کے لیے تقریباً 300 ارب روپے مختص کرنے پر غور کر رہی ہے، تاکہ عالمی منڈی میں تیل کی قیمتوں میں اضافے کا بوجھ عوام پر کم سے کم منتقل ہو۔ وزارت خزانہ نے اس حوالے سے چاروں صوبوں سے بھی مالی تعاون کی درخواست کی ہے اور تجویز دی ہے کہ صوبے اپنے بجٹ سے 154 ارب روپے فراہم کریں۔
حکومتی حلقوں کے مطابق اس وقت دو اہم آپشنز زیر غور ہیں۔ پہلا یہ کہ عالمی منڈی میں قیمتوں کا پورا بوجھ صارفین پر منتقل کر دیا جائے، جبکہ دوسرا آپشن یہ ہے کہ صرف مخصوص طبقات کو ٹارگٹ کر کے سبسڈی دی جائے۔ اس سلسلے میں موٹر سائیکلوں اور رکشوں کو ترجیح دی جا رہی ہے کیونکہ یہ زیادہ تر متوسط اور نچلے طبقے کی سواری ہیں۔
تجویز کے مطابق موٹر سائیکل سواروں کو ماہانہ 20 لیٹر جبکہ رکشہ ڈرائیورز کو 30 لیٹر تک سستا پیٹرول فراہم کیا جا سکتا ہے۔ اس اقدام سے روزانہ کی بنیاد پر سفر کرنے والے لاکھوں افراد کو براہ راست فائدہ پہنچنے کی توقع ہے۔
ذرائع کا کہنا ہے کہ اس اسکیم کو حتمی شکل دینے کے لیے آئندہ ہفتے ایک اہم اجلاس متوقع ہے جس میں صدر مملکت، وزیراعظم اور چاروں صوبوں کے وزرائے اعلیٰ شریک ہوں گے۔ اس اجلاس میں سبسڈی کے طریقہ کار اور فنڈز کی تقسیم پر فیصلہ کیا جائے گا۔
دوسری جانب حکام نے یقین دہانی کرائی ہے کہ ملک میں پیٹرول کا موجودہ ذخیرہ مئی کے پہلے ہفتے تک ضروریات پوری کرنے کے لیے کافی ہے، جس سے فوری قلت کا خدشہ نہیں ہے۔
موٹر سائیکل اور رکشہ سواروں کیلئے سستا پیٹرول دینے کی تیاری
