اسرائیل کے وسطی علاقے میں میزائل حملوں کے بعد ایک ورکشاپ میں خوفناک آگ بھڑک اٹھی، جس پر فائر فائٹرز نے بروقت کارروائی کرتے ہوئے قابو پانے کی کوشش کی۔ غیر ملکی میڈیا کے مطابق یہ واقعہ تل ابیب سے تقریباً 6 میل مشرق میں واقع شہر پیتاح تکوا میں پیش آیا، جہاں دھماکوں کے بعد آگ کے شعلے دور دور تک دیکھے گئے۔
آئی ڈی ایف کا کہنا ہے کہ مرکزی اسرائیل میں مختلف مقامات پر میزائل گرنے کی اطلاعات موصول ہونے کے بعد سرچ اینڈ ریسکیو ٹیمیں فوری طور پر روانہ کر دی گئی ہیں تاکہ متاثرہ علاقوں میں امدادی کارروائیاں کی جا سکیں۔دوسری جانب اسرائیل کی قومی ایمرجنسی سروس نے تصدیق کی ہے کہ علاقے میں میزائل حملہ ہوا ہے جس کے نتیجے میں متعدد افراد معمولی زخمی ہوئے ہیں۔ زخمیوں کو فوری طور پر قریبی اسپتالوں میں منتقل کر دیا گیا۔
گزشتہ 24 گھنٹوں کے دوران مزید 123 افراد زخمی ہوئے ہیں، جس کے بعد جنگ کے آغاز سے اب تک مجموعی زخمیوں کی تعداد 6,131 تک پہنچ گئی ہے۔ اس وقت 118 افراد مختلف اسپتالوں میں زیر علاج ہیں، جن میں سے 18 کی حالت تشویشناک یا نازک بتائی جا رہی ہے۔ادھر اسرائیلی فوج نے تصدیق کی ہے کہ لبنان میں جاری فوجی کارروائیوں کے دوران اس کے مزید 4 اہلکار ہلاک ہو گئے ہیں، جس کے بعد جنگ میں ہلاک ہونے والے اسرائیلی فوجیوں کی تعداد 10 ہو گئی ہے۔