ہنگو کے علاقے خیساری میں دہشتگردوں کا ایک خطرناک منصوبہ بروقت کارروائی کے ذریعے ناکام بنا دیا گیا، جہاں سڑک کنارے نصب 10 کلو وزنی دیسی ساختہ بم (آئی ای ڈی) کو بم ڈسپوزل یونٹ اور پولیس نے ناکارہ بنا دیا۔
پولیس کے مطابق مشتبہ بم کی اطلاع ملتے ہی بم ڈسپوزل یونٹ اور سیکیورٹی اہلکار موقع پر پہنچ گئے اور علاقے کو گھیرے میں لے کر حفاظتی اقدامات کیے گئے۔ ماہرین نے پیشہ ورانہ مہارت کا مظاہرہ کرتے ہوئے بم کو کامیابی سے ناکارہ بنایا، جس کے بعد ممکنہ بڑے جانی و مالی نقصان سے بچاؤ ممکن ہوا۔ڈی پی او ہنگو طارق حبیب کا کہنا ہے کہ دہشتگردوں کی جانب سے نصب کیا گیا 10 کلو وزنی آئی ای ڈی بم انتہائی خطرناک نوعیت کا تھا اور کسی بڑے سانحے کا سبب بن سکتا تھا۔ انہوں نے کہا کہ پولیس اور بم ڈسپوزل یونٹ کی بروقت اور مؤثر کارروائی کے باعث علاقے کو ممکنہ تباہی سے بچا لیا گیا۔
ڈی پی او نے سیکیورٹی فورسز اور بم ڈسپوزل یونٹ کی کارکردگی کو سراہتے ہوئے کہا کہ دہشتگرد عناصر کے ناپاک عزائم کو ہر صورت ناکام بنایا جائے گا اور عوام کے جان و مال کے تحفظ کے لیے تمام دستیاب وسائل بروئے کار لائے جا رہے ہیں۔واقعے کے بعد علاقے میں سیکیورٹی مزید سخت کر دی گئی ہے جبکہ پولیس نے تحقیقات کا آغاز کرتے ہوئے بم نصب کرنے والے عناصر کی تلاش بھی شروع کر دی ہے۔