عمران خان اور بشریٰ بی بی کی جیل میں 45 منٹ کی ملاقات

اڈیالہ جیل راولپنڈی میں پابندِ سلاسل سابق وزیراعظم اور بانی چیئرمین پاکستان تحریکِ انصاف عمران خان سے ان کی اہلیہ بشریٰ بی بی کی ملاقات کروا دی گئی۔

جیل ذرائع کے مطابق یہ ملاقات منگل کے روز طے شدہ شیڈول کے تحت عمل میں آئی۔ذرائع کا کہنا ہے کہ عمران خان اور بشریٰ بی بی تقریباً 45 منٹ تک ایک دوسرے کے ساتھ رہے، جس دوران دونوں نے ایک دوسرے کی خیریت دریافت کی اور باہمی گفتگو کی۔ ملاقات جیل قوانین اور سکیورٹی ضوابط کے مطابق کرائی گئی۔
جیل حکام کے مطابق یہ ملاقات کوئی پہلی نہیں، اس سے قبل بھی گزشتہ منگل کو عمران خان اور بشریٰ بی بی کی ملاقات کروائی گئی تھی۔ تاہم اس دوران جیل انتظامیہ نے واضح کیا کہ بیرونِ جیل سے کسی بھی عزیز، رشتہ دار، پارٹی رہنما یا وکیل کو عمران خان یا بشریٰ بی بی سے ملاقات کی اجازت نہیں دی گئی۔

ذرائع کے مطابق ملاقات کے موقع پر سکیورٹی کے سخت انتظامات کیے گئے تھے اور ملاقات کا دورانیہ مکمل ہونے پر بشریٰ بی بی کو واپس جیل کے مقررہ حصے میں منتقل کر دیا گیا، جبکہ عمران خان اپنی بیرک میں واپس چلے گئے۔