ایرانی وزارت خارجہ کے ترجمان نے دعویٰ کیا ہے کہ ایران میں امریکی پائلٹ کو نکالنے کے لیے کیا گیا مبینہ ریسکیو آپریشن دراصل افزودہ یورینیم چرانے کا ایک کور آپریشن ہو سکتا ہے۔
ترجمان کے مطابق اس امریکی کارروائی کے حوالے سے متعدد سوالات اور غیر یقینی صورتحال موجود ہے، جبکہ جس مقام پر امریکی پائلٹ کی موجودگی کا دعویٰ کیا گیا وہ اس جگہ سے کافی دور ہے جہاں طیارہ گرنے کی اطلاعات تھیں۔
انہوں نے کہا کہ ان حالات میں یہ امکان نظرانداز نہیں کیا جا سکتا کہ اس آپریشن کا اصل مقصد کسی اور نوعیت کی کارروائی ہو، جس میں حساس جوہری مواد تک رسائی بھی شامل ہو سکتی ہے۔
ایرانی ترجمان نے مزید کہا کہ یہ آپریشن امریکا کے لیے تباہ کن ثابت ہوا اور اس کے نتائج نے کئی نئے سوالات کو جنم دیا ہے۔
ماہرین کے مطابق ایسے دعوؤں کی آزادانہ تصدیق ممکن نہیں، تاہم یہ بیانات جاری کشیدگی میں بیانیہ جنگ کو مزید تیز کر رہے ہیں۔
یہ بیان ایسے وقت میں سامنے آیا ہے جب ایران اور امریکا کے درمیان کشیدگی عروج پر ہے اور دونوں جانب سے الزامات اور جوابی بیانات کا سلسلہ جاری ہے۔
ایران میں امریکی پائلٹ کا ریسکیو آپریشن افزودہ یورینیم چرانے کا کور آپریشن ہوسکتا ہے: ترجمان ایرانی وزارت خارجہ
