حملوں کی منصوبہ بندی پر ایران میں 2 افراد کو سزائے موت


ایران میں عدلیہ نے حملوں کی منصوبہ بندی کے الزام میں دو افراد کو سزائے موت دے دی ہے۔ ایرانی حکام کے مطابق دونوں افراد ایک اپوزیشن گروپ سے وابستہ تھے اور ملک میں مسلح کارروائیوں کی تیاری میں ملوث تھے۔
ایرانی عدلیہ کے بیان کے مطابق سزا پانے والے افراد پیپلز مجاہدین آرگنائزیشن آف ایران سے منسلک تھے، جن پر الزام تھا کہ وہ تہران میں دیسی ساختہ لانچر ڈیوائسز کے ذریعے حملوں کی منصوبہ بندی کر رہے تھے۔
‎حکام کا کہنا ہے کہ ان افراد کے خلاف مقدمہ مکمل ہونے کے بعد قانونی تقاضے پورے کیے گئے اور عدالت نے انہیں سزائے موت سنائی۔
‎ایرانی حکام کے مطابق ملک میں سیکیورٹی کو درپیش خطرات کے پیش نظر ایسے عناصر کے خلاف سخت کارروائی کی جا رہی ہے تاکہ ممکنہ حملوں کو روکا جا سکے۔
‎ماہرین کے مطابق اس طرح کے فیصلے ایران میں سیکیورٹی صورتحال اور سیاسی کشیدگی کی عکاسی کرتے ہیں، جبکہ اپوزیشن گروپس اور حکومت کے درمیان تناؤ بھی نمایاں ہے۔