ایران کی پاسدارانِ انقلاب نے امریکا کو سخت پیغام دیتے ہوئے کہا ہے کہ اگر ایرانی بندرگاہوں کو کسی بھی قسم کا خطرہ لاحق ہوا تو دنیا میں کوئی بندرگاہ محفوظ نہیں رہے گی۔ یہ بیان خطے میں بڑھتی کشیدگی کے دوران سامنے آیا ہے، جس نے صورتحال کو مزید حساس بنا دیا ہے۔
پاسدارانِ انقلاب کے مطابق آبنائے ہرمز پر ایران کا کنٹرول موجود ہے اور اگر کسی نے اسے آزمانے کی کوشش کی تو سخت ردعمل دیا جائے گا۔ بیان میں کہا گیا کہ کسی بھی جارحیت یا غلط قدم کا جواب فوری اور بھرپور ہوگا۔
ایرانی فورسز نے خبردار کیا کہ اگر غیر ملکی فوجی جہاز ایرانی حدود کے قریب آئے تو ان کے خلاف سخت کارروائی کی جائے گی۔ مزید یہ کہ جہازوں کی نقل و حرکت پر کسی بھی قسم کی پابندی کو ایران نے بحری قزاقی قرار دیا ہے، جو بین الاقوامی قوانین کے خلاف ہے۔
دوسری جانب ایرانی پارلیمنٹ کے اسپیکر باقر قالیباف نے ایک متنازع بیان دیتے ہوئے وائٹ ہاؤس کے قریب ایک پیٹرول پمپ کی لوکیشن شیئر کی اور کہا کہ موجودہ تیل کی قیمتوں سے فائدہ اٹھایا جائے، کیونکہ اگر ناکہ بندی کی صورتحال پیدا ہوئی تو چار سے پانچ ڈالر فی گیلن پیٹرول بھی یاد کیا جائے گا۔
ماہرین کے مطابق ایران کے اس سخت مؤقف سے خطے میں کشیدگی مزید بڑھ سکتی ہے، خاص طور پر ایسے وقت میں جب آبنائے ہرمز عالمی توانائی سپلائی کے لیے انتہائی اہم راستہ ہے۔ کسی بھی ممکنہ تصادم کے اثرات عالمی منڈیوں اور تیل کی قیمتوں پر براہ راست پڑ سکتے ہیں۔
ایران کی امریکا کو سخت وارننگ، بندرگاہوں پر حملہ ہوا تو جواب شدید ہوگا
