اسلام آباد: ایرانی وفد کی پاکستان آمد کا طویل انتظار اب ختم ہونے کے قریب ہے، ذرائع کے مطابق ایرانی وفد کا طیارہ پاکستانی فضائی حدود میں داخل ہونے والا ہے، جس کے بعد اہم سفارتی سرگرمیوں کا باقاعدہ آغاز متوقع ہے۔
ذرائع کا کہنا ہے کہ وفد کی آمد کے ساتھ ہی اسلام آباد میں جاری سیکیورٹی انتظامات مزید سخت کر دیے گئے ہیں، جبکہ ریڈ زون میں پہلے ہی ہائی الرٹ نافذ ہے۔ حکام اس دورے کو نہایت اہم قرار دے رہے ہیں کیونکہ اس کے دوران امریکا اور ایران کے درمیان ممکنہ مذاکرات میں پیش رفت کی امید کی جا رہی ہے۔
عالمی سطح پر بھی اس پیش رفت پر گہری نظر رکھی جا رہی ہے، کیونکہ یہ مذاکرات نہ صرف خطے بلکہ عالمی امن اور معیشت پر بھی اثر انداز ہو سکتے ہیں۔ پاکستان اس عمل میں ایک اہم ثالثی کردار ادا کر رہا ہے، جسے عالمی سطح پر سراہا جا رہا ہے۔
ذرائع کے مطابق وفد کی آمد کے فوراً بعد اعلیٰ سطحی ملاقاتوں اور مشاورت کا سلسلہ شروع ہو جائے گا، جبکہ سیکیورٹی ادارے کسی بھی ہنگامی صورتحال سے نمٹنے کے لیے مکمل تیار ہیں۔
یہ پیش رفت اس بات کی عکاسی کرتی ہے کہ اسلام آباد ایک بار پھر عالمی سفارتکاری کا مرکز بن چکا ہے، جہاں اہم فیصلوں کی بنیاد رکھی جا رہی ہے۔
ایرانی وفد پاکستانی فضائی حدود میں داخل ہونے کے قریب، انتظار ختم
