واشنگٹن: ایرانی ہیکرز نے دعویٰ کیا ہے کہ انہوں نے امریکی تحقیقاتی ادارے ایف بی آئی کے ڈائریکٹر کاش پٹیل کا ذاتی ای میل اکاؤنٹ ہیک کر لیا ہے، جس کے بعد سائبر سیکیورٹی حلقوں میں تشویش کی لہر دوڑ گئی ہے۔
غیر ملکی میڈیا رپورٹس کے مطابق ایران سے منسلک ہیکرز گروپ نے کہا ہے کہ وہ ایف بی آئی کے سربراہ کے ای میل ان باکس تک رسائی حاصل کرنے میں کامیاب رہے۔ ہیکرز نے اپنے دعوے کے ثبوت کے طور پر مبینہ طور پر ڈائریکٹر کی ذاتی تصاویر اور اہم دستاویزات انٹرنیٹ پر شائع بھی کر دی ہیں۔رپورٹس کے مطابق لیک ہونے والی معلومات کی نوعیت اور حساسیت کا مکمل اندازہ تاحال نہیں لگایا جا سکا، تاہم ماہرین کا کہنا ہے کہ اگر یہ دعوے درست ثابت ہوئے تو یہ امریکی سیکیورٹی نظام کے لیے ایک بڑا دھچکا ہو سکتا ہے۔
دوسری جانب ایف بی آئی یا امریکی حکام کی جانب سے اس واقعے پر باضابطہ ردعمل سامنے نہیں آیا، جبکہ سائبر سیکیورٹی ماہرین اس معاملے کی تحقیقات اور ممکنہ نقصانات کا جائزہ لے رہے ہیں۔تجزیہ کاروں کے مطابق حالیہ برسوں میں ایران اور امریکہ کے درمیان بڑھتی ہوئی کشیدگی کے تناظر میں اس نوعیت کے سائبر حملے جیوپولیٹیکل تنازعات کا نیا محاذ بن چکے ہیں، جس سے عالمی سطح پر ڈیجیٹل سیکیورٹی کے خطرات میں اضافہ ہو رہا ہے۔