اسلام آباد میں امریکا ایران مذاکرات کے پیش نظر دو روزہ تعطیل

‎وفاقی حکومت نے امریکا اور ایران کے درمیان متوقع اہم مذاکرات کے پیش نظر اسلام آباد میں جمعرات اور جمعہ کو مقامی تعطیل کا اعلان کر دیا ہے۔ اس فیصلے کے ساتھ ہی دارالحکومت میں سیکیورٹی کے غیر معمولی انتظامات کیے جا رہے ہیں تاکہ کسی بھی ممکنہ صورتحال سے نمٹا جا سکے۔
‎اطلاعات کے مطابق ضلعی انتظامیہ نے شہر کے مختلف داخلی و خارجی راستوں پر سخت نگرانی شروع کر دی ہے جبکہ مارگلہ ایونیو کو بھی بند کر دیا گیا ہے۔ حساس مقامات پر سیکیورٹی مزید سخت کرتے ہوئے پہاڑی چوٹیوں پر اینٹی ایئرکرافٹ سسٹمز اور اہم عمارتوں پر اسنائپرز تعینات کیے گئے ہیں۔
‎ذرائع کے مطابق سرینا ہوٹل، نادرا چوک اور میریٹ کے اطراف کے علاقوں میں بھی آمدورفت محدود کر دی گئی ہے، جبکہ شہر میں داخل ہونے اور باہر جانے والے افراد کی سخت چیکنگ جاری ہے۔ ان اقدامات کا مقصد ممکنہ عالمی سطح کے مذاکرات کے دوران مکمل سیکیورٹی کو یقینی بنانا ہے۔
‎بتایا جا رہا ہے کہ امریکا اور ایران کے درمیان حالیہ جنگ بندی کے بعد مستقل امن کے قیام کے لیے اہم مذاکرات اسلام آباد میں متوقع ہیں۔ ایرانی خبر رساں اداروں کے مطابق ایران کی پارلیمنٹ کے اسپیکر محمد باقر قالیباف ایک اعلیٰ سطحی وفد کی قیادت کریں گے جو امریکی نائب صدر جے ڈی وینس سے ملاقات کرے گا۔
‎ذرائع کے مطابق یہ مذاکرات جمعہ کے روز شروع ہونے کا امکان ہے، جن کا مقصد دونوں ممالک کے درمیان کشیدگی کو مستقل طور پر ختم کرنے کے لیے سیاسی حل تلاش کرنا ہے۔ پاکستان ان مذاکرات میں ثالث کا کردار ادا کر رہا ہے۔
‎وزیراعظم شہباز شریف نے جنگ بندی پر اظہار تشکر کرتے ہوئے دونوں ممالک کے وفود کو 10 اپریل کو اسلام آباد آنے کی دعوت دی ہے۔ حکام کا کہنا ہے کہ یہ مذاکرات خطے میں امن کے قیام کے لیے ایک اہم پیش رفت ثابت ہو سکتے ہیں۔