اسلام آباد ہائی کورٹ میں 190 ملین پاؤنڈ کیس کے سلسلے میں عمران خان اور بشریٰ بی بی کی سزا معطلی درخواستوں پر سماعت چیف جسٹس سرفراز ڈوگر اور جسٹس محمد آصف نے کی۔
نیب کے اسپیشل پراسیکیوٹر جاوید اشرف اور رافع مقصود جبکہ عمران خان کے وکیل بیرسٹر سلمان صفدر عدالت میں پیش ہوئے۔ دوران سماعت سلمان صفدر نے 31 مارچ کے عدالتی حکم کا حوالہ دیا، جس پر چیف جسٹس نے استفسار کیا کہ متفرق درخواست کیا ہے، جس پر عمران خان سے ملاقات کی درخواست منظور کرتے ہوئے جیل حکام کو ہدایت دی گئی کہ وہ وکیل کی ملاقات یقینی بنائیں۔ عدالت نے سلمان صفدر سے ملاقات کا وقت پوچھا تو انہوں نے دوپہر دو بجے کا وقت تجویز کیا، جس پر عدالت نے اگلے روز دو بجے ملاقات کرانے کا حکم جاری کر دیا۔
اسلام آباد ہائیکورٹ کے چیف جسٹس نے ریمارکس دیے کہ ہر ہفتے دو دن اپیل مقرر کر کے وکیل کو اپنے مؤکل سے ملاقات کا موقع دیا جا سکتا ہے، تاہم سلمان صفدر نے مؤقف اختیار کیا کہ پہلے جیل میں ملاقات کے بعد ہی وہ عدالت کی معاونت کریں گے۔ چیف جسٹس نے یہ بھی کہا کہ خاتون ملزمہ کے حوالے سے سزا معطلی درخواست پر فیصلہ کیا جا سکتا ہے اور اگر اپیل پر دلائل شروع ہو جائیں تو سات دن میں فیصلہ بھی ممکن ہے، تاہم انہوں نے یہ بھی کہا کہ عدالت کو پیر کے دن کی مصروفیات کا پیشگی علم نہیں ہوتا اور معاملے کو غیر ضروری طور پر اچھالا جانا مناسب نہیں۔ بعد ازاں عدالت نے کیس کی مزید سماعت جمعرات تک ملتوی کر دی۔