اسلام آباد پولیس نے شہر کے مختلف علاقوں میں گرینڈ سرچ اینڈ کومبنگ آپریشن کیا۔ آپریشن زونل ایس پیز کی نگرانی میں کیا گیا، جس میں لیڈیز پولیس اہلکاروں نے بھی حصہ لیا۔
کارروائی کے دوران 409 افراد اور 309 گھروں کی جانچ پڑتال کی گئی، جبکہ 126 موٹر سائیکلوں اور 56 گاڑیوں کو چیک کیا گیا۔
پولیس کے مطابق ایک افغان شہری سمیت 18 مشکوک افراد اور 14 موٹر سائیکلوں کو مزید تفتیش کے لیے متعلقہ تھانوں منتقل کیا گیا۔
حکام کا کہنا ہے کہ آپریشن کا مقصد جرائم کی روک تھام اور امن و امان کو یقینی بنانا ہے۔ آئی جی اسلام آباد نے ضلع بھر میں ایسے گرینڈ سرچ آپریشنز جاری رکھنے کے احکامات دیے ہیں۔
پولیس نے شہریوں سے اپیل کی ہے کہ چیکنگ کے دوران تعاون کریں اور کسی بھی مشکوک سرگرمی کی فوری اطلاع دیں، کیونکہ شہریوں کا تحفظ اولین ترجیح ہے۔
اسلام آباد کے مختلف علاقوں میں گرینڈ سرچ آپریشن، 18 مشکوک افراد تھانے منتقل
