باجوڑ،جماعت اسلامی کے نائب امیر اور سابق امیدوار برائے صوبائی اسمبلی مولانا وحید گل کی رہائش گاہ کے باہر زور دار بم دھماکا ہوا جس سے علاقے میں شدید خوف و ہراس پھیل گیا۔ خوش قسمتی سے اس واقعے میں کوئی جانی نقصان نہیں ہوا۔
پولیس ذرائع کے مطابق دھماکا مولانا وحید گل کے گھر کے عین سامنے کیا گیا، جس کے نتیجے میں ان کے گھر اور وہاں کھڑی گاڑی کو جزوی طور پر نقصان پہنچا۔ دھماکے کی آواز دور دور تک سنی گئی جس کے باعث مقامی مکین گھروں سے باہر نکل آئے۔واقعے کی اطلاع ملتے ہی پولیس کی بھاری نفری، بم ڈسپوزل اسکواڈ اور تفتیشی ٹیمیں فوری طور پر جائے وقوعہ پر پہنچ گئیں۔ پولیس نے علاقے کو گھیرے میں لے کر شواہد اکٹھے کیے جبکہ بم ڈسپوزل ماہرین نے دھماکے کی نوعیت کا تعین شروع کر دیا ہے۔پولیس حکام کا کہنا ہے کہ ابتدائی تحقیقات کے مطابق دھماکا بارودی مواد کے ذریعے کیا گیا، تاہم حتمی رپورٹ شواہد کے مکمل تجزیے کے بعد مرتب کی جائے گی۔ واقعے کے بعد علاقے میں سیکیورٹی مزید سخت کر دی گئی ہے۔
مولانا وحید گل اس وقت محفوظ ہیں اور ان کے اہل خانہ بھی مکمل طور پر محفوظ ہیں۔ واقعے کی وجوہات اور ذمہ داروں کا تعین کرنے کے لیے مختلف پہلوؤں سے تحقیقات جاری ہیں۔ پولیس کا کہنا ہے کہ جلد ملزمان کو گرفتار کر کے قانون کے کٹہرے میں لایا جائے گا۔