امریکی ارب پتی شخصیت جیف بیزوز اپنی اہلیہ کے ہمراہ میٹ گالا 2026 میں اعزازی مشترکہ چیئرپرسن مقرر کیے جانے کے بعد شدید تنقید کی زد میں آ گئے ہیں۔
بین الاقوامی رپورٹس کے مطابق جیف بیزوز پر الزام عائد کیا جا رہا ہے کہ انہوں نے میٹ گالا 2026 میں نمایاں مقام حاصل کرنے کے لیے 10 سے 20 ملین ڈالر تک خرچ کیے۔ ذرائع کا دعویٰ ہے کہ یہ اقدام محض روایتی سرپرستی نہیں بلکہ ثقافتی اثر و رسوخ خریدنے کی کوشش کے طور پر دیکھا جا رہا ہے، جس نے امیر شخصیات کے بڑھتے ہوئے کنٹرول پر نئی بحث چھیڑ دی ہے۔رپورٹ میں ایک ذریعے کے حوالے سے کہا گیا ہے کہ ماضی میں میٹ گالا میں شرکت اور اہم ذمہ داریاں تخلیقی صلاحیت، فیشن میں اثر و رسوخ اور میرٹ کی بنیاد پر دی جاتی تھیں، تاہم اب اس کی نوعیت بدلتی دکھائی دے رہی ہے اور تقریب زیادہ تر مالی لین دین پر منحصر محسوس ہوتی ہے۔
سابق ووگ ایونٹ منتظم نے بھی اس صورتحال پر ردِعمل دیتے ہوئے کہا کہ میٹ گالا کی اصل روح متاثر ہو رہی ہے اور فیشن انڈسٹری میں اس تبدیلی پر تشویش پائی جا رہی ہے۔دوسری جانب شوبز اور فیشن حلقوں میں بھی بے چینی بڑھ رہی ہے۔ بین الاقوامی میڈیا رپورٹس کے مطابق کئی معروف شخصیات نے مبینہ طور پر اس سال کے ایونٹ سے دور رہنے کا فیصلہ کیا ہے، جس سے تقریب کے وقار اور شفافیت سے متعلق سوالات مزید شدت اختیار کر گئے ہیں۔