پاکستان بھر میں فضائی سفر کرنے والے مسافروں کو کرایوں میں نمایاں اضافے کا سامنا ہے کیونکہ جیٹ فیول کی قیمتوں میں غیر معمولی اضافہ ہوا ہے۔ اگرچہ بنیادی ٹکٹ قیمتیں برقرار رکھی گئی ہیں، لیکن فیول سرچارج نے مجموعی اخراجات کو کافی بڑھا دیا ہے۔
جیٹ فیول کی قیمت 176 روپے فی لیٹر سے بڑھ کر 417 روپے فی لیٹر تک پہنچ گئی ہے، جس کے باعث خدشہ ظاہر کیا جا رہا ہے کہ فضائی سفر عام افراد کی پہنچ سے مزید دور ہو سکتا ہے۔
ایئرلائنز نے بنیادی کرایوں میں تبدیلی نہیں کی، لیکن فیول ایڈجسٹمنٹ کے باعث ٹکٹ کی مجموعی قیمتوں میں نمایاں اضافہ ہو گیا ہے۔
پاکستان انٹرنیشنل ایئرلائن (پی آئی اے) کے ترجمان کے مطابق کئی ایئرلائنز نے فیول سرچارج کے ذریعے کرایوں میں 100 فیصد تک اضافہ کیا ہے، جبکہ تمام ایئرلائنز نے اپنی قیمتوں میں ایندھن کی بنیاد پر ردوبدل کیا ہے۔
پی آئی اے نے مختلف روٹس پر نئے سرچارجز نافذ کر دیے ہیں۔ اندرون ملک پروازوں پر 10 ڈالر اضافی چارج کیا جا رہا ہے، جبکہ بین الاقوامی پروازوں پر اس سے زیادہ اضافہ دیکھنے میں آیا ہے۔
کینیڈا جانے والی پروازوں پر 100 ڈالر تک، برطانیہ کے لیے 75 ڈالر اور سعودی عرب و دیگر خلیجی ممالک کے لیے 50 ڈالر تک اضافی چارجز عائد کیے گئے ہیں۔
نجی ایئرلائنز نے بھی اسی رجحان کو اپناتے ہوئے ٹکٹوں پر 15 سے 150 ڈالر تک اضافی فیس عائد کر دی ہے، جو مختلف روٹس اور ایئرلائنز کے حساب سے مختلف ہے۔
جیٹ فیول مہنگا، فضائی کرایوں میں بڑا اضافہ، مسافروں پر اضافی بوجھ
