کراچی کے پوش علاقے ڈیفنس ہاؤسنگ اتھارٹی (ڈی ایچ اے) میں واقع خیابانِ اتحاد عبدالستار ایونیو پر نصب ڈیجیٹل ایڈورٹائزمنٹ اسکرینز کو نامعلوم ہیکرز نے ہیک کرکے چند لمحوں کے لیے غیر اخلاقی مواد نشر کر دیا،
ذرائع کے مطابق واقعہ اس وقت پیش آیا جب مصروف شاہراہ پر نصب بڑی ڈیجیٹل اسکرینز پر اچانک غیر اخلاقی ویڈیوز چلنا شروع ہو گئیں۔ واقعے کی ویڈیو راہگیروں کی جانب سے ریکارڈ کر کے سوشل میڈیا پر شیئر کی گئی، جو دیکھتے ہی دیکھتے وائرل ہو گئی۔ ویڈیو وائرل ہونے کے بعد متعلقہ اداروں نے فوری نوٹس لیتے ہوئے متنازعہ ڈیجیٹل اسکرینز کو بند کر دیا۔حکام کا کہنا ہے کہ احتیاطی تدابیر کے پیش نظر صرف خیابانِ اتحاد ہی نہیں بلکہ ڈی ایچ اے کی دیگر اہم شاہراہوں کے علاوہ شاہراہِ فیصل اور کارساز روڈ پر نصب متعدد ڈیجیٹل ایڈورٹائزمنٹ اسکرینز کو بھی عارضی طور پر بند کر دیا گیا ہے، تاکہ کسی ممکنہ سائبر حملے یا مزید غیر قانونی مواد کی نشریات کو روکا جا سکے۔
واقعے کے بعد نیشنل سائبر کرائم انویسٹی گیشن ایجنسی (این سی سی آئی اے) اور سائبر کرائم یونٹ نے مشترکہ طور پر تحقیقات کا آغاز کر دیا ہے۔ تفتیشی حکام کے مطابق اسکرینز کو ہیک کرنے میں ملوث عناصر کی نشاندہی کے لیے تکنیکی شواہد، سرور لاگز، آئی پی ایڈریسز اور دیگر ڈیجیٹل ڈیٹا اکٹھا کیا جا رہا ہے۔حکام کا مزید کہنا ہے کہ ابتدائی تحقیقات میں سائبر سیکیورٹی کی کمزوریوں کا بھی جائزہ لیا جا رہا ہے اور ڈیجیٹل ایڈورٹائزمنٹ نیٹ ورک سے منسلک کمپنیوں کو سیکیورٹی نظام مزید مضبوط بنانے کی ہدایات دی جا رہی ہیں۔ واقعے میں ملوث افراد کے خلاف سائبر کرائم قوانین کے تحت سخت قانونی کارروائی عمل میں لائی جائے گی۔
شہریوں نے واقعے پر شدید تشویش کا اظہار کرتے ہوئے مطالبہ کیا ہے کہ عوامی مقامات پر نصب ڈیجیٹل اسکرینز کی سائبر سیکیورٹی کو مؤثر بنایا جائے تاکہ آئندہ اس نوعیت کے شرمناک واقعات سے بچا جا سکے۔