کراچی میں رنگ برنگی اور فینسی نمبر پلیٹس استعمال کرنے والے شہریوں کے لیے سخت وارننگ جاری کر دی گئی ہے، ٹریفک پولیس نے ایسے عناصر کے خلاف بڑے پیمانے پر کریک ڈاؤن کا فیصلہ کر لیا ہے۔
تفصیلات کے مطابق حکام نے واضح کیا ہے کہ اب سڑکوں پر نظر آنے والی کسی بھی غیر قانونی یا فینسی نمبر پلیٹ والی گاڑی یا موٹر سائیکل کے خلاف فوری کارروائی کی جائے گی اور کسی قسم کی رعایت نہیں دی جائے گی۔
ٹریفک پولیس کے مطابق فینسی اور غیر معیاری نمبر پلیٹس سیکیورٹی کے لیے بڑا خطرہ بن چکی ہیں کیونکہ جرائم پیشہ افراد اکثر وارداتوں کے دوران انہی پلیٹس کا استعمال کرتے ہیں تاکہ اپنی شناخت چھپا سکیں۔
ریکارڈ کے مطابق لاکھوں چالان کیے جانے کے باوجود شہری اس قانون کی خلاف ورزی جاری رکھے ہوئے ہیں، جس کے بعد اب سخت اقدامات کا فیصلہ کیا گیا ہے۔
حکام کا کہنا ہے کہ اب صرف جرمانے تک محدود نہیں رہا جائے گا بلکہ خلاف ورزی کرنے والوں کی گاڑیاں اور موٹر سائیکلیں موقع پر ہی ضبط کر لی جائیں گی اور بھاری جرمانے بھی عائد کیے جائیں گے۔
ٹریفک پولیس نے ہدایت کی ہے کہ شہری فوری طور پر اپنی گاڑیوں سے فینسی یا تبدیل شدہ نمبر پلیٹس ہٹا دیں اور صرف ایکسائز اینڈ ٹیکسیشن ڈیپارٹمنٹ کی جاری کردہ سرکاری نمبر پلیٹس استعمال کریں، بصورت دیگر سخت قانونی کارروائی کا سامنا کرنا پڑے گا۔
کراچی میں فینسی نمبر پلیٹس کے خلاف سخت کریک ڈاؤن، گاڑیاں ضبط کرنے کا فیصلہ
