کراچی سے لاہور جانے والی ایک مسافر کوچ پر سندھ کے علاقے کنڈیارو کے قریب نامعلوم افراد نے پتھراؤ کر دیا، جس کے نتیجے میں خواتین اور بچوں سمیت 10 مسافر زخمی ہو گئے۔
پولیس کے مطابق واقعہ اس وقت پیش آیا جب کوچ کے ڈرائیور اور چند موٹرسائیکل سواروں کے درمیان کسی بات پر تکرار ہوئی، جس کے بعد مشتعل مقامی افراد نے کوچ کو نشانہ بنایا اور پتھراؤ شروع کر دیا،پتھراؤ کے باعث کوچ کے شیشے ٹوٹ گئے جبکہ اندر بیٹھے مسافروں میں خوف و ہراس پھیل گیا۔ زخمی ہونے والوں میں خواتین اور بچے بھی شامل ہیں، جنہیں فوری طور پر قریبی اسپتال منتقل کر دیا گیا۔پولیس حکام کا کہنا ہے کہ حملہ آور واقعے کے بعد فرار ہو گئے، تاہم ان کی شناخت اور گرفتاری کے لیے کارروائی شروع کر دی گئی ہے،حکام کے مطابق واقعے کا مقدمہ درج کر کے ملوث افراد کے خلاف سخت قانونی کارروائی کی جائے گی۔
اس واقعے نے شاہراہوں پر مسافروں کی حفاظت اور امن و امان کی صورتحال پر ایک بار پھر سوالات کھڑے کر دیے ہیں