کراچی: سینیئر کامرس رپورٹر ،رکن کراچی پریس کلب رفیق بشیر چل بسے

کراچی کے سینئر کامرس رپورٹر، معروف صحافی اور کراچی پریس کلب کے رکن رفیق بشیر طویل علالت کے بعد انتقال کر گئے۔

خاندانی ذرائع کے مطابق رفیق بشیر گزشتہ دو ماہ سے بسترِ علالت پر تھے ، آج وہ اپنے خالقِ حقیقی سے جا ملے۔ مرحوم نے صحافت کے شعبے میں دہائیوں پر محیط خدمات انجام دیں اور اپنی پیشہ ورانہ دیانت، تحقیقی رپورٹنگ اور شائستہ مزاج کے باعث صحافی برادری میں عزت و احترام کی نگاہ سے دیکھے جاتے تھے۔رفیق بشیر کراچی پریس کلب کے سینئر رکن تھے جبکہ روزنامہ جنگ، کراچی میں بطور رپورٹر خدمات سرانجام دیتے رہے۔ وہ روزنامہ جنگ کی اسٹاف یونین کے صدر بھی رہ چکے تھے اور اس کے علاوہ کراچی پریس کلب کی گورننگ باڈی کے سابق رکن کے طور پر بھی ان کی خدمات یاد رکھی جائیں گی۔

مرحوم کی نمازِ جنازہ آج بعد نمازِ مغرب مدنی مسجد، سیکٹر 16-A، ملک سوسائٹی، اسکیم 33 میں ادا کی جائے گی، جبکہ تدفین سخی حسن قبرستان میں ہوگی۔ صحافتی تنظیموں، ساتھیوں اور دوست احباب نے اہلِ خانہ سے دلی تعزیت کا اظہار کیا ہے اور مرحوم کی خدمات کو خراجِ عقیدت پیش کیا ہے۔اللہ تعالیٰ سے دعا ہے کہ وہ مرحوم رفیق بشیر کی کامل مغفرت فرمائے، ان کے درجات بلند کرے اور اہلِ خانہ کو صبرِ جمیل عطا فرمائے۔ آمین۔