اسلام آباد میں خطے کی بدلتی ہوئی صورتحال اور مشرقِ وسطیٰ میں جاری جنگ کے تناظر میں ایک اہم سفارتی اجلاس شروع ہو گیا ہے، جس میں پاکستان، ترکی، مصر اور سعودی عرب کے وزرائے خارجہ شریک ہیں۔ اس اجلاس کو خطے میں امن و استحکام کے لیے اہم پیش رفت قرار دیا جا رہا ہے۔
ریڈیو پاکستان کے مطابق اجلاس کی صدارت نائب وزیراعظم اور وزیر خارجہ اسحاق ڈار کر رہے ہیں، جبکہ شریک ممالک کے وزرائے خارجہ موجودہ کشیدگی، ممکنہ سفارتی حل اور مشترکہ حکمت عملی پر تبادلہ خیال کر رہے ہیں۔
ذرائع کے مطابق اس اجلاس میں خاص طور پر ایران اور امریکا کے درمیان جاری کشیدگی اور ممکنہ مذاکرات پر بھی غور کیا جا رہا ہے۔ پاکستان اس وقت دونوں ممالک کے درمیان ثالثی کا کردار ادا کرنے کی کوشش کر رہا ہے تاکہ کشیدگی کو کم کیا جا سکے اور بات چیت کا عمل آگے بڑھ سکے۔
یہ بھی سامنے آیا ہے کہ امریکا کی جانب سے تیار کردہ 15 نکاتی مجوزہ امن منصوبہ اسلام آباد کے ذریعے تہران تک پہنچایا گیا تھا، جس سے پاکستان کے فعال سفارتی کردار کی عکاسی ہوتی ہے۔
ماہرین کے مطابق اس نوعیت کے علاقائی اجلاس خطے میں اعتماد سازی اور کشیدگی میں کمی کے لیے اہم ثابت ہو سکتے ہیں، جبکہ پاکستان کی ثالثی کی کوششیں اسے عالمی سطح پر ایک اہم سفارتی پلیئر کے طور پر سامنے لا رہی ہیں۔
پاکستان، ترکی، سعودی عرب اور مصر کے وزرائے خارجہ کا اجلاس اسلام آباد میں جاری
