تھانہ بنی گالہ پولیس کی فوری اور موثر کارروائی کے نتیجے میں خود کو پولیس اہلکار ظاہر کرنے والے تین ملزمان کو گرفتار کر لیا گیا ہے۔ گرفتار ملزمان سے ایک مغوی کو بحفاظت بازیاب کروا لیا گیا ہے۔
پولیس نے کارروائی کے دوران چھینی گئی گاڑی، ہتھکڑیاں، پولیس یونیفارم، ماسک، وائرلیس سیٹ، واردات میں استعمال ہونے والی گاڑی، اسلحہ اور ایمونیشن بھی برآمد کر لی ہے۔ ملزمان کی شناخت خالد محمود، محمد ظفر اور جمیل احمد کے طور پر ہوئی ہے۔
ڈی آئی جی اسلام آباد محمد جواد طارق نے تھانہ بنی گالہ پولیس ٹیم کی بروقت اور موثر کارروائی پر خصوصی طور پر شاباش دی ہے۔ انہوں نے کہا کہ شہریوں کی جان و مال پر حملہ کرنے والوں کے خلاف پولیس آہنی ہاتھوں سے نمٹے گی۔گرفتار ملزمان سے مزید تفتیش جاری ہے تاکہ واردات کے دیگر پہلوؤں کو بھی کھوجا جا سکے اور اس نوعیت کے جرائم کی روک تھام کی جا سکے۔ڈی آئی جی اسلام آباد کا کہنا تھا کہ پولیس ہر صورت قانون کی حکمرانی قائم رکھے گی اور عوام کے تحفظ کو یقینی بنایا جائے گا۔