کیا اس کا مطلب ہے کہ وزیر جو مرضی کرتا رہے اور اسے کوئی نہ پوچھے؟ چیف الیکشن کمشنر

الیکشن کمیشن میں وزیر مملکت برائے داخلہ طلال چوہدری اور این اے 96 فیصل آباد سے رکن قومی اسمبلی بلال بدر کے خلاف ضابطہ اخلاق کی خلاف ورزی کے کیس کی سماعت چیف الیکشن کمشنر کی سربراہی میں تین رکنی کمیشن نے کی۔

سماعت کے دوران طلال چوہدری کے وکیل نے دلائل دیتے ہوئے مؤقف اختیار کیا کہ طلال چوہدری غیر مشروط معافی مانگ چکے ہیں اور 20 نومبر کو ڈی ایم او نے ضابطہ اخلاق کی خلاف ورزی نہ کرنے کی وارننگ جاری کی تھی، اسی روز 50 ہزار روپے جرمانہ بھی عائد کر دیا گیا۔ وکیل کے مطابق ڈی ایم او نے قانون کے مطابق کارروائی نہیں کی اور طلال چوہدری نے ضابطہ اخلاق کی خلاف ورزی نہیں کی۔ اس موقع پر چیف الیکشن کمشنر نے ریمارکس دیے کہ کیا اس کا مطلب یہ ہے کہ وزیر جو مرضی کرتا رہے اور اسے کوئی نہ پوچھے؟

الیکشن کمیشن حکام نے مؤقف اختیار کیا کہ ضابطہ اخلاق کی خلاف ورزی پر کارروائی کا مکمل اختیار الیکشن کمیشن کے پاس ہے اور طلال چوہدری کے خلاف ویڈیو شواہد موجود ہیں، جبکہ ڈی ایم او نے وزیر مملکت کے اثر و رسوخ کے باعث صرف وارننگ جاری کی۔ تاہم ممبر سندھ نے کہا کہ یہ ثابت کرنا ممکن نہیں کہ اثر و رسوخ استعمال ہوا۔ سماعت کے اختتام پر الیکشن کمیشن نے کیس کا فیصلہ محفوظ کر لیا۔

دوسری جانب الیکشن کمیشن میں این اے 4 سوات سے پی ٹی آئی کے حمایت یافتہ رکن سہیل سلطان کی نااہلی کے ریفرنس پر چیف الیکشن کمشنر کی سربراہی میں تین رکنی کمیشن نےسماعت کی،سہیل سلطان نےالیکشن کمیشن سے دو ہفتے کا وقت دینے کی استدعا کی اور کہا کہ مجھے وکیل کرنے کیلئے وقت چاہئیے،چیف الیکشن کمشنر نے کہا کہ پہلے ہی ہائیکورٹ کے حکم امتناع کے باعث بہت تاخیر ہو چکی ہے، الیکشن کمیشن نے ریفرنس پر مقررہ وقت میں فیصلہ کرنا ہے،الیکشن کمیشن نے سہیل سلطان کو وکیل کرنے کیلئے ایک روز کا وقت دے دیا سماعت کل تک ملتوی کر دی گئی.

علاوہ ازیں عابد شیر علی نے الیکشن کمیشن سے غیر مشروط معافی مانگ لی،الیکشن کمیشن میں عابد شیر علی کے خلاف فیصل آباد ضمنی انتخاب میں ووٹ کی رازداری کی خلاف ورزی کیس کی سماعت ہوئی،چیف الیکشن کمشنر کی سربراہی میں تین رکنی کمیشن نے سماعت کی،عابد شیر علی الیکشن کمیشن میں پیش ہوئے، وکیل نے کہا کہ ووٹ کی رازداری کی خلاف ورزی پر عابد شیر علی غیر مشروط معافی مانگ رہے ہیں،عابد شیر علی نے ویڈیو سوشل میڈیا پر اپلوڈ کی نہ کروائی،عابد شیر علی نے ووٹ کی رازداری کے خلاف ورزی پر غیر مشروط معافی نامہ جمع کروا دیا ،الیکشن کمیشن نے فیصلہ محفوظ کر لیا،چیف الیکشن کمشنر نے کہا کہ دیکھیں گے کہ معافی نامہ قبول کرنا ہے یا نہیں،