خیبر پختونخوا میں سی ٹی ڈی نے کاروائی کرتے ہوئے دو الگ الگ واقعات میں چھ دہشتگردوں کو جہنم واصل کر دیا
محکمہ انسداد دہشتگردی خیبرپختونخوا پشاور نے خفیہ اطلاع پر پشاور کے نواحی علاقے ٹپوسانو باچا قبرستان، ظاہر گھڑی میں دہشتگردوں کے خلاف ٹارگٹڈ آپریشن کیا۔ کارروائی کے دوران تین انتہائی مطلوب دہشتگرد مارے گئے۔ آپریشن کے دوران دہشتگردوں کے کچھ ساتھی آبادی کا فائدہ اٹھاتے ہوئے فرار ہونے میں کامیاب ہو گئے، جن کی گرفتاری کے لیے علاقے میں سرچ اینڈ اسٹرائیک آپریشن جاری ہے۔ ہلاک دہشتگردوں کی شناخت کا عمل بھی جاری ہے۔ سی ٹی ڈی کے مطابق مارے گئے دہشتگردوں کے قبضے سے دو کلاشنکوفیں اور ایک پستول بمع کارتوس برآمد ہوئے ہیں۔
ضلع خیبر میں سی ٹی ڈی کی کارروائی، 3 دہشتگرد ہلاک،
محکمہ انسداد دہشتگردی (سی ٹی ڈی) خیبر نے خفیہ اطلاع پر جمرود میں شاہ کس بائی پاس روڈ پر واقع ناکے کلے کے قریب کارروائی کرتے ہوئے دہشتگردوں کے ایک ٹھکانے کو نشانہ بنایا۔ کارروائی کے دوران تین دہشتگرد ہلاک ہو گئے جبکہ ان کے دو ساتھی پہاڑی علاقے کی جانب فرار ہونے میں کامیاب ہو گئے، جن کی تلاش جاری ہے۔ سی ٹی ڈی کے مطابق ہلاک دہشتگرد سرگرم رکن تھے اور سیکیورٹی فورسز پر حملوں، قتل و اقدامِ قتل، بھتہ خوری سمیت دیگر دہشتگردی کی متعدد وارداتوں میں ملوث رہے ہیں۔ کارروائی کے دوران دہشتگردوں کے قبضے سے تین کلاشنکوفیں اور ایمونیشن بھی برآمد کیا گیا۔