لاہور (باغی ٹی وی)خواتین اور بچوں کے خلاف جرائم کی لہر، 3 ماہ میں 27 قتل، 151 زیادتی اور 1100 اغوا
تفصیلات کے مطابق پنجاب کا دل کہلانے والا شہر لاہور ان دنوں خوفناک جرائم کی لپیٹ میں ہے، جہاں خواتین اور بچوں کے خلاف سنگین واقعات نے شہریوں کو دہشت زدہ کر دیا ہے۔ نجی ٹی وی کی رپورٹ کے مطابق پولیس کے تازہ اعداد و شمار نے سب کو ہلا کر رکھ دیا ہے، رواں سال جنوری سے مارچ تک محض تین ماہ میں 27 خواتین قتل، 151 سے زیادتی اور 1,182 اغوا ہوئیں۔ ان میں سے 988 کو تو بازیاب کرا لیا گیا، لیکن 194 اب بھی لاپتا ہیں.
خوف کی یہ داستان صرف خواتین تک محدود نہیں۔ ان تین ماہ میں 138 بچوں کو اغوا کیا گیا، جن میں سے 14 کے بارے میں اب تک کچھ پتا نہیں۔ زیادتی کے واقعات نے بھی انسانیت کو شرمسار کیا،خواتین کے ساتھ 151 اور بچوں کے ساتھ 47 کیسز رپورٹ ہوئے۔
پولیس نے دعویٰ کیا کہ خواتین سے زیادتی کے 110 ملزمان کو دھر لیا گیا، لیکن 41 اب بھی قانون کے ہاتھوں سے باہر ہیں۔ بچوں کے ساتھ زیادتی کے 44 ملزمان گرفتار ہوئے، مگر 3 فرار ہیں۔ یہ اعداد و شمار بتاتے ہیں کہ جرائم کے سائے گہرے ہوتے جا رہے ہیں۔
پولیس حکام نے "زیرو ٹالرنس” کا راگ الاپتے ہوئے کہا کہ بیشتر مقدمات حل کر لیے گئے ہیں۔ لیکن ماہرین سماجیات اسے شہر کے امن کے لیے خطرے کی گھنٹی قرار دے رہے ہیں۔ شہریوں میں خوف اور بے چینی بڑھتی جا رہی ہے اور عوام حکام سے فوری انصاف اور بہتر تحفظ کا مطالبہ کر رہے ہیں۔ سوال یہ ہے کہ کیا لاہور واقعی "پیرس آف پاکستان” رہ گیا، یا اب یہ صرف جرائم کی کہانیوں کا شہر بن کر رہ جائے گا؟