ہانگ کانگ فلم انڈسٹری کے معروف اور لیجنڈری مارشل آرٹس اداکار سیو لونگ لیونگ 77 برس کی عمر میں انتقال کر گئے۔ ان کے اہلِ خانہ نے ان کے انتقال کی تصدیق کرتے ہوئے بتایا کہ وہ پُرسکون انداز میں اس دنیا سے رخصت ہوئے۔
غیر ملکی میڈیا رپورٹس کے مطابق سیو لونگ لیونگ کے اہلِ خانہ نے ان کے انتقال کی تصدیق ہانگ کانگ کے ایک معروف میڈیا ادارے کو کی۔ خاندان کا کہنا ہے کہ تدفین کے انتظامات نجی طور پر کیے جا رہے ہیں، جبکہ ان کی آخری رسومات اور الوداعی تقریب 26 جنوری 2026 کو چین کے صوبہ گوانگ ڈونگ کے شہر شین ژین کے علاقے لونگ گانگ میں منعقد کی جائے گی۔
رپورٹس کے مطابق سیو لونگ لیونگ ہانگ کانگ فلم انڈسٹری کا ایک بڑا نام تھے اور 1970 اور 1980 کی دہائی میں مارشل آرٹس فلموں کے صفِ اول کے اداکاروں میں شمار ہوتے تھے۔ انہیں فلمی دنیا میں خاص شہرت اُس وقت ملی جب انہوں نے فلموں میں کردار ’’چن ژن‘‘ ادا کیا، جو بعد ازاں کنگ فو فلموں کا ایک یادگار کردار بن گیا۔
سیو لونگ لیونگ نے نئی نسل کے ناظرین میں بھی اپنی پہچان برقرار رکھی، خاص طور پر عالمی شہرت یافتہ فلم کنگ فو ہسل میں ’’دی بیسٹ‘‘ کے کردار کے ذریعے۔ اس فلم میں ان کی اداکاری آج بھی فلم کے نمایاں اور پسندیدہ پہلوؤں میں شمار کی جاتی ہے۔
سیو لونگ لیونگ اُن اداکاروں میں شامل تھے جنہوں نے نہ صرف اسکرین پر بلکہ حقیقی زندگی میں بھی مارشل آرٹس میں مہارت حاصل کی، اور اپنی فنی صلاحیتوں کے ذریعے ہانگ کانگ سنیما پر گہرے نقوش چھوڑے۔
لیجنڈری مارشل آرٹس اداکار 77 برس کی عمر میں انتقال کر گئے
