ملک میں ایل این جی کی سپلائی تقریباً صفر ہونے کے بعد بجلی کے شعبے میں شدید دباؤ کا خدشہ پیدا ہو گیا ہے، جس کے باعث اپریل سے لوڈشیڈنگ میں اضافے کی پیشگوئی کی جا رہی ہے۔
ذرائع کے مطابق پاور پلانٹس کو گیس کی فراہمی میں کمی متوقع ہے، جس کے نتیجے میں روزانہ 2 سے 3 گھنٹے تک بجلی کی بندش ہو سکتی ہے۔
حکومتی سطح پر اس صورتحال سے نمٹنے کے لیے مختلف تجاویز پر غور کیا جا رہا ہے، جن میں سی این جی سیکٹر کو مکمل طور پر بند کرنا اور کھاد کارخانوں کو فراہم کی جانے والی گیس میں کمی کر کے پاور سیکٹر کو منتقل کرنا شامل ہے۔
رپورٹس کے مطابق پاور سیکٹر مجموعی طور پر 10 سے 15 فیصد ایل این جی استعمال کرتا رہا ہے، اور موجودہ بحران کے پیش نظر توانائی کی ترجیحات میں تبدیلی ناگزیر ہو گئی ہے۔
ذرائع پاور ڈویژن کا کہنا ہے کہ ڈیزل کے ذریعے بجلی پیدا کرنا انتہائی مہنگا ثابت ہو سکتا ہے، جس کی لاگت 80 روپے فی یونٹ سے تجاوز کر سکتی ہے، اسی وجہ سے ڈیزل سے بجلی پیدا نہ کرنے کا امکان ظاہر کیا جا رہا ہے۔
ماہرین کے مطابق توانائی کی سپلائی میں یہ خلل نہ صرف بجلی کی قلت کو بڑھا سکتا ہے بلکہ صنعتی اور گھریلو صارفین کے لیے مشکلات میں بھی اضافہ کرے گا۔
ایل این جی بحران، لوڈشیڈنگ میں اضافے کا خدشہ
