مرکزی مسلم لیگ کے سیکرٹری جنرل سیف اللہ قصوری نے کہا ہے کہ پاکستان امن کا علمبردار،امریکا ،ایران کے مابین مذاکرات کے لئے دوبارہ اسلام آباد کی کوششیں قابل تحسین ہیں،بلوچستان پاکستان کا دل،بلوچ قوم محب وطن،محرومیوں کے ازالے کی ضرورت ہے، مرکزی مسلم لیگ بلوچستان سمیت تمام صوبوں میں ہونے والے بلدیاتی انتخابات میں بھر پور حصہ لے گی، کارکنان بھر پور طریقے سے تیاری کریں
ان خیالات کا اظہار انہوں نے ایک اجلاس سے خطاب کرتے ہوئے کیا، اجلاس میں صدر مرکزی مسلم لیگ بلوچستان عقیل احمد لغاری، سردار احمد مجتبی رند، حافظ ادریس، عبداللہ شر و دیگر نے شرکت کی، اجلاس میں مرکزی مسلم لیگ کے کارکنان بھی شریک ہوئے، اس موقع پرجنرل سیکرٹری مرکزی مسلم لیگ کوئٹہ میر شاہجہان گرگناڑی کی طرف سے سیف اللہ قصوری کو روایتی بلوچی دستار بھی پہنائی گئی، اجلا س سے خطاب کرتے ہوئے سیف اللہ قصوری کا کہنا تھا کہ دو قومی نظریئے کی بنیاد پر بننے والا ملک پاکستان آج امن کا علمبردار بن کر دنیا کے سامنے کھڑا ہے، امریکا ایران جنگ بندی کے لئے پاکستان کا کردار عالمی دنیا تسلیم کر رہی ہے،دہشتگردی کے خلاف جنگ میں پاکستان نے بے شمار قربانیاں دیں،بلوچستان میں دشمن قوتیں دہشتگردی و تخریب کاری کروا رہی ہیں تا کہ پاکستان کو عدم استحکام سے دوچار کیا جا سکے،مرکزی مسلم لیگ نے ہمیشہ نہ صرف دہشت گردی کی مذمت کی بلکہ اس فتنے کے خلاف قوم کو متحد و بیدار بھی کیا،ایک قوم بن کر رہیں گے تو ملک مضبوط ہو گا،دفاع وطن کے لئے اہل بلوچستان کی قربانیوں کی قدر کرتے ہیں،بلوچستان کی محرومیوں کے خاتمے کے لئے مرکزی مسلم لیگ ہر ممکن کوشش کرے گی، آئی ٹی تربیتی پروگرام شروع کر کے نوجوانوں کو ہنر مند بنائیں گے،
سیف اللہ قصوری کا مزید کہنا تھا کہ بلوچستان سمیت پنجاب، خیبر پختونخوا میں بلدیاتی انتخابات میں مرکزی مسلم لیگ حصہ لے گی،کارکنان اس ضمن میں تیاریاں شروع کر دیں، ہم سیاسی سطح پر کوئی میدان خالی نہیں چھوڑیں گے، کنٹونمنٹ بورڈ کے انتخابات میں بھی حصہ لیں گے،عوامی مسائل کے حل کے لئے مرکزی مسلم لیگ کوشاں رہے گی، خدمت کی سیاست ہمارا منشور اور مرکزی مسلم لیگ کی خدمت ملک بھر میں دیکھنے کو ملے گی.