درختوں کی کٹائی کا شاخسانہ حبیب چوک گولیوں کی تھرتھراہٹ سے لرز اٹھا، قاضی عمیر زندگی کی بازی ہار گیا
سرکل گوجرخان میں انسانی جان ارزاں چاند رات سے جاری قتل و غارت کے پے در پے واقعات، شہری حلقے شدید تشویش کا شکار
گوجرخان (قمرشہزاد) سرکل گوجرخان کے گردونواح میں عدم برداشت کا بڑھتا ہوا رجحان خونی جنگ میں تبدیل ہو گیا، جہاں چاند رات سے شروع ہونے والا قتل و غارت گری کا سلسلہ تھمنے کا نام نہیں لے رہا۔ اشتعال انگیزی کے بڑھتے ہوئے واقعات نے امن و امان کی صورتحال کو سنگین بنا دیا ہے۔جس نے شہریوں میں شدید خوف و ہراس پھیلا دیا ہے۔
تازہ ترین افسوسناک واقعہ پولیس چوکی قاضیاں کے نواحی علاقے حبیب چوک میں پیش آیا، جہاں مبینہ طور پر درختوں کی کٹائی کے معمولی تنازع پر مخالفین نے اندھا دھند فائرنگ کر دی۔ فائرنگ کے اس ہولناک واقعے کے نتیجے میں چار افراد شدید زخمی ہوئے، جنہیں ریسکیو ٹیموں نے فوری طور پر تحصیل ہیڈ کوارٹر ہسپتال گوجرخان منتقل کیا۔ ابتدائی طبی امداد کے بعد زخمیوں کو راولپنڈی ریفر کیا گیا، تاہم قاضی عمیر زخموں کی تاب نہ لاتے ہوئے راستے میں ہی دم توڑ گئے۔ دیگر زخمیوں میں قاضی شفیق، نزاکت اور عبدالشکور شامل ہیں جن کا علاج جاری ہے۔ واقعہ کی اطلاع ملتے ہی انچارج پولیس چوکی قاضیاں نفری کے ہمراہ فوری طور پر موقع پر پہنچے اور جائے وقوعہ سے اہم شواہد اکٹھے کیے۔ پولیس تھانہ گوجرخان نے واقعے کا مقدمہ درج کر کے باقاعدہ تحقیقات کا آغاز کرتے ہوئے ملزمان کی گرفتاری کے لیے چھاپے مارنے شروع کر دئیے ہیں۔
عوامی اور سماجی حلقوں نے انسانی جانوں کے آئے روز کے اس ضیاع پر گہرے دکھ کا اظہار کرتے ہوئے معاشرے میں بڑھتے ہوئے تشدد کے رجحان کو لمحہ فکریہ قرار دیتے ہوئے کہا ہے کہ گوجرخان میں قانون کا ڈر خوف ختم ہو گیا ہے ہر گزرتے دن کے ساتھ قتل و غارت گری اور فائرنگ کے واقعات میں اضافہ لمحہ فکریہ ہے۔