وفاقی وزیر برائے قومی غذائی تحفظ و تحقیق، رانا تنویر حسین کی زیر صدارت نیشنل ویٹ اوور سائٹ کمیٹی کا 11واں اعلیٰ سطح اجلاس ہوا
اجلاس میں گندم کی خریداری مہم، کٹائی کی پیش رفت اور مارکیٹ میں رائج قیمتوں کا جائزہ لیا گیا۔اجلاس میں گندم کی فصل کی مجموعی صورتحال، خریداری اہداف اور سپلائی چین کے نظام کا تفصیلی جائزہ لیا گیا۔وفاقی وزیر نے کہا کہ ملکی مارکیٹ میں گندم کی قیمتیں عالمی رجحانات کے مطابق ہیں، جو فی من 3,500 سے 4,000 روپے کے درمیان ہیں، جس سے کسانوں کو مناسب معاوضہ ملتا ہے اور صارفین کے لیے بھی قیمتیں قابل برداشت رہتی ہیں۔وفاقی وزیر نے حکومت کو کسانوں کے مفادات کے تحفظ کے لیے منصفانہ قیمتوں اور ہموار خریداری نظام یقینی بنانے کی ہدایت کی۔رانا تنویر حسین نے کہا کہ مقامی ضروریات پوری کرنے اور غذائی تحفظ برقرار رکھنے کے لیے وافر مقدار میں گندم موجود ہے۔