گزشتہ دو گھنٹوں کے دوران ایران کی جانب سے بیلسٹک میزائلوں اور ڈرونز کے مسلسل حملوں نے اسرائیل اور مغربی کنارے میں صورتحال کو انتہائی کشیدہ بنا دیا ہے۔
رپورٹس کے مطابق میزائل حملوں کی متعدد لہروں کے بعد تل ابیب، یروشلم، اردن ویلی اور دیگر علاقوں میں الرٹ جاری کر دیا گیا جبکہ اشدود، ہولون، ریشون لی زیون اور رامات گن سمیت بڑے شہروں میں سائرن گونجتے رہے، جس کے باعث لاکھوں افراد کو پناہ گاہوں میں منتقل ہونا پڑا۔
حملوں کے نتیجے میں تل ابیب میں براہ راست نقصان کی اطلاعات ہیں جبکہ کفر قاسم میں زخمیوں کی اطلاع ملی ہے۔ بیت شیمش کے صنعتی علاقے اور بن گوریون ایئرپورٹ کے قریب بھی دھماکوں کی آوازیں سنی گئیں۔ اسرائیلی ذرائع کے مطابق ان حملوں میں کم از کم 4 افراد زخمی ہوئے ہیں۔
شمالی محاذ پر گلیل کے علاقوں میں ڈرونز کی دراندازی اور راکٹ حملوں میں اضافہ دیکھا گیا۔ نہاریا اور عکا کے قریب ڈرونز داخل ہوئے جبکہ ایک ڈرون لیمان کے علاقے میں گر کر جانی نقصان کا باعث بنا۔ اسرائیلی دفاعی نظام نے لبنان سے داغے گئے متعدد راکٹس کو فضا میں ہی تباہ کیا۔
ادھر ایران کی جانب سے امریکا اور اس کے اتحادیوں کے خلاف بھی مربوط حملے کیے گئے، جن میں بحرین، کویت، سعودی عرب اور اردن میں فوجی اڈوں، ایئرپورٹس اور توانائی تنصیبات کو نشانہ بنایا گیا۔ بحرین کی وزارت داخلہ کے مطابق محرق صوبے کی ایک تنصیب میں حملے کے باعث آگ لگ گئی۔
خطے میں تیزی سے بگڑتی ہوئی صورتحال کے باعث سیکیورٹی خدشات میں مزید اضافہ ہو گیا ہے اور عالمی سطح پر تشویش بڑھ رہی ہے۔
ایران کے شدید میزائل اور ڈرون حملے، اسرائیل اور خلیجی ممالک میں ہنگامی صورتحال
