کرناٹک کے ضلع تماکورو میں ایک افسوسناک واقعہ پیش آیا جہاں 33 سالہ خاتون نے مبینہ طور پر نجومی کے بہکاوے میں آکر اپنی 55 سالہ والدہ کو قتل کردیا۔ پولیس کے مطابق مقتولہ کی شناخت پشپاوَتی (مقامی طور پر پُپّاوتی) کے نام سے ہوئی ہے جبکہ ملزمہ اس کی بیٹی سچترا ہے۔
پولیس ذرائع کے مطابق سچترا اپنے شوہر کے ساتھ تماکورو شہر میں رہتی تھی۔ تقریباً ڈیڑھ سال قبل اس کے والد کا انتقال ہوگیا تھا۔ والد کی وفات کے بعد سچترا نے ایک نجومی سے رابطہ کیا۔ مبینہ طور پر نجومی نے اسے بتایا کہ اس کی ماں نے کالے جادو کے ذریعے اس کے والد کی جان لی ہے۔پولیس کا کہنا ہے کہ نجومی کے دعووں پر یقین کرتے ہوئے سچترا اپنی والدہ کے گھر گئی اور رات کے وقت جب وہ سو رہی تھیں تو تکیے سے ان کا گلا دبا کر انہیں قتل کردیا۔واقعے کے بعد ملزمہ نے قتل کو طبعی موت ظاہر کرنے کی کوشش کی۔ اس نے جلدی میں آخری رسومات کے انتظامات بھی شروع کردیئے تاہم گاؤں کے کچھ افراد کو حالات مشکوک لگے اور انہوں نے موت کی وجوہات پر شبہ ظاہر کیا۔
دیہاتیوں کی اطلاع پر پولیس موقع پر پہنچ گئی اور آخری رسومات سے قبل ہی کارروائی کرتے ہوئے لاش کو تحویل میں لے لیا۔ ابتدائی پوچھ گچھ کے دوران سچترا نے مبینہ طور پر جرم کا اعتراف کرلیا۔کیاتسندرا پولیس اسٹیشن میں قتل کا مقدمہ درج کرلیا گیا ہے اور مزید تحقیقات جاری ہیں۔ پولیس سچترا کے شوہر سے بھی پوچھ گچھ کر رہی ہے تاکہ یہ معلوم کیا جا سکے کہ آیا اسے اس منصوبے کے بارے میں کوئی علم تھا یا نہیں۔پولیس حکام کا کہنا ہے کہ واقعے کے تمام پہلوؤں کا باریک بینی سے جائزہ لیا جا رہا ہے جبکہ نجومی کے کردار کی بھی تحقیقات کی جا رہی ہیں۔