ننکانہ صاحب (احسان اللہ ایاز، باغی ٹی وی) ڈپٹی کمشنر محمد تسلیم اختر راؤ، ڈسٹرکٹ پولیس آفیسر ارسلان زاہد اور کرنل حیدر خان کی زیر صدارت ڈسٹرکٹ کوآرڈینیشن کمیٹی برائے ہوم ڈیپارٹمنٹ کا ماہانہ اجلاس ڈی سی آفس کے کمیٹی روم میں منعقد ہوا۔ اجلاس میں ایڈیشنل ڈپٹی کمشنرز، اسسٹنٹ کمشنرز، فوج، پولیس، ایکسائز، ایف بی آر، کسٹمز، انفارمیشن سمیت تمام ضلعی اداروں کے سربراہان نے شرکت کی۔
اجلاس میں تمام محکموں کی کارکردگی کا تفصیلی جائزہ لیا گیا جبکہ ایڈیشنل ڈپٹی کمشنر جنرل سفیان دلاور نے اداروں کی کارکردگی پر بریفنگ دی۔
ڈپٹی کمشنر محمد تسلیم اختر راؤ نے اجلاس سے خطاب کرتے ہوئے ہدایت کی کہ تمام افسران اپنی ذمہ داریوں کا واضح تعین کریں اور عوامی مسائل کو ترجیحی بنیادوں پر حل کیا جائے۔ انہوں نے بیوٹیفیکیشن منصوبوں پر عملدرآمد، صفائی ستھرائی کی بہتری، تجاوزات کے خاتمے اور پرائس کنٹرول کے اقدامات کو مزید تیز کرنے کی ہدایت دی۔
انہوں نے سمگل شدہ تیل اور دیگر اشیاء فروخت کرنے والوں کے خلاف سخت کارروائی کا حکم دیتے ہوئے کہا کہ غیر قانونی گیس ری فلنگ کرنے والوں کے ساتھ کوئی رعایت نہ برتی جائے۔ مزید برآں دینی مدارس کی رجسٹریشن جلد مکمل کرنے اور حکومتی ترقیاتی منصوبوں کو مقررہ وقت میں شفافیت کے ساتھ مکمل کرنے پر زور دیا۔