گاڑی نہیں تو ملاقات نہیں،نیویارک میں ڈیٹنگ کا نیارجحان

نیویارک میں ڈیٹنگ کے نئے رجحان نے مردوں اور خواتین کے درمیان نئی بحث چھیڑ دی ہے، جہاں سوشل میڈیا پر "نو رائیڈ، نو ڈیٹ” (گاڑی نہیں تو ملاقات نہیں) کا مطالبہ شدید تنازع کا سبب بن گیا ہے۔

امریکی شہر نیویارک کی معروف لائف اسٹائل انفلوئنسر سوانا پگنوزی نے ایک وائرل ویڈیو میں دعویٰ کیا کہ اگر کوئی مرد پہلی ملاقات سے قبل خاتون کو لینے کے لیے گاڑی یا کار سروس کی پیشکش نہ کرے تو وہ اس کے ساتھ ڈیٹ پر نہیں جاتیں۔ ان کے اس بیان نے سوشل میڈیا پر ایک نئی بحث کو جنم دے دیا ہے۔سوانا پگنوزی نے اپنی ویڈیو میں کہا کہ یہ ان کا بنیادی اصول ہے کہ مرد کم از کم گاڑی بھیجنے کی پیشکش ضرور کرے، چاہے خاتون اسے قبول کرے یا نہ کرے۔ ان کے مطابق اگر ایسا نہ کیا جائے تو ملاقات منسوخ کر دی جاتی ہے۔

انہوں نے ایک حالیہ واقعے کا ذکر کرتے ہوئے بتایا کہ ایک شخص سے ملاقات کے بعد دونوں نے ڈیٹ کا پروگرام بنایا تھا، تاہم بارش والی شام میں اس شخص نے انہیں لینے کے لیے گاڑی بھیجنے یا انتظام کرنے کی پیشکش نہیں کی، جس پر انہوں نے ملاقات منسوخ کر دی۔ویڈیو کے وائرل ہونے کے بعد ہزاروں صارفین نے اس پر ردعمل دیا۔ متعدد مرد صارفین نے اس مطالبے کو غیر ضروری، غیر حقیقی اور "حق سمجھنے والی سوچ” قرار دیا۔ ناقدین کا کہنا تھا کہ اگر مرد پہلے ہی کھانے اور دیگر اخراجات برداشت کر رہا ہے تو گاڑی کا اضافی مطالبہ مناسب نہیں۔

ایک صارف نے تبصرہ کیا کہ "اچھے مرد ایسے رویے کو برداشت نہیں کریں گے”، جبکہ دوسرے نے لکھا کہ "آخر مرد آپ کو گاڑی کیوں فراہم کرے؟ کیا مرد صرف اے ٹی ایم ہیں جو ہر چیز کی ادائیگی کریں؟”

کچھ صارفین نے طنزیہ انداز میں سوال کیا کہ "کیا آپ شہزادی ڈیانا ہیں کہ آپ کے لیے خصوصی گاڑی بھیجی جائے؟” جبکہ بعض خواتین نے بھی اس سوچ پر تنقید کرتے ہوئے کہا کہ مرد سے ہر چیز کی توقع رکھنا درست نہیں۔تاہم دوسری جانب کئی خواتین نے سوانا کی حمایت بھی کی۔ ان کا مؤقف تھا کہ نیویارک جیسے بڑے شہر میں خاص طور پر رات یا خراب موسم کے دوران خواتین کی سہولت اور تحفظ کے لیے مرد کو گاڑی کا انتظام کرنا چاہیے۔سوشل میڈیا پر کئی خواتین نے لکھا کہ جب وہ نیویارک میں رہتی تھیں تو ان کا بھی یہی اصول تھا کہ اگر مرد گاڑی کا بندوبست نہ کرے تو وہ ملاقات قبول نہیں کرتیں۔ بعض خواتین نے یہ بھی کہا کہ کچھ مرد ڈیٹ کے بعد واپسی کے لیے بھی ٹیکسی یا رائیڈ کا انتظام نہیں کرتے، جبکہ سنجیدہ اور خیال رکھنے والے مرد خواتین کو اپنی رائیڈ شیئرنگ ایپ کے اکاؤنٹ میں شامل تک کر لیتے ہیں۔

ماہرین کے مطابق یہ تنازع دراصل جدید ڈیٹنگ کلچر میں مرد اور خواتین کی مختلف توقعات کی عکاسی کرتا ہے۔ حالیہ برسوں میں ریستوران کے بل 50-50 تقسیم کرنے، پہلی ملاقات کے اخراجات اور ڈیٹ سے قبل تصدیقی پیغامات جیسے موضوعات بھی شدید بحث کا مرکز بن چکے ہیں۔سوشل میڈیا پر جاری اس نئی بحث نے ایک بار پھر یہ سوال اٹھا دیا ہے کہ جدید تعلقات میں شائستگی، احترام اور مالی ذمہ داریوں کی حدود کہاں تک ہونی چاہئیں، اور کیا ڈیٹنگ کے دوران خصوصی سہولیات کی توقع مناسب ہے یا نہیں۔