پاکستان فارماسوٹیکل مینوفیکچرز ایسوسی ایشن نے ادویات کی قیمتوں میں اضافے اور قلت سے متعلق خبروں کی سختی سے تردید کرتے ہوئے وضاحت جاری کر دی ہے۔ ادارے کے مطابق ملک بھر میں نہ تو ضروری ادویات کی قیمتوں میں اضافہ کیا گیا ہے اور نہ ہی ان کی فراہمی میں کوئی کمی آئی ہے۔
پی پی ایم اے کے بیان میں کہا گیا ہے کہ پیٹرول اور ڈیزل کی قیمتوں میں 20 فیصد سے زائد اضافے کے باوجود ادویات کی قیمتیں کئی ماہ سے برقرار ہیں۔ اس دوران ایندھن، فریٹ اور خام مال کی درآمدی لاگت میں نمایاں اضافہ ہوا، لیکن اس کا بوجھ مریضوں پر منتقل نہیں کیا گیا۔
ادارے کے مطابق انسولین، اینٹی بایوٹکس، دل کے امراض، ہائی بلڈ پریشر، ذیابیطس اور ویکسینز سمیت تمام اہم ادویات ملک بھر میں بلا تعطل دستیاب ہیں۔ مزید بتایا گیا کہ پاکستان میں تقریباً 90 فیصد ادویات مقامی سطح پر تیار کی جاتی ہیں اور صنعت کے پاس خام مال اور تیار ادویات کا مناسب ذخیرہ موجود ہے، جس سے طلب پوری کی جا رہی ہے۔
پی پی ایم اے نے کہا کہ ادویہ ساز صنعت نے بڑھتی لاگت کے باوجود عوام کو ریلیف دینے کے لیے خود دباؤ برداشت کیا ہے تاکہ قیمتوں میں اضافہ نہ کرنا پڑے۔ تاہم کچھ جدید اور جان بچانے والی ادویات جیسے کینسر کے علاج، ویکسینز اور امیونوگلوبیولنز کی محدود دستیابی کی وجہ سرکاری سطح پر قیمتوں کے نوٹیفکیشن میں تاخیر ہے۔
بیان میں کہا گیا کہ اگر ڈرگ ریگولیٹری اتھارٹی آف پاکستان کی جانب سے منظور شدہ قیمتوں کا بروقت اعلان کر دیا جائے تو ان ادویات کی دستیابی بہتر ہو سکتی ہے۔
پی پی ایم اے نے حکومت سے پالیسی رکاوٹیں دور کرنے اور میڈیا سے غیر مصدقہ خبروں سے گریز کرنے کی اپیل کی تاکہ عوام میں بے چینی نہ پھیلے اور ادویات کے حوالے سے درست معلومات فراہم کی جا سکیں۔
ادویات مہنگی نہیں ہوئیں، قلت کی خبریں بے بنیاد، پی پی ایم اے
