ٹوکیو: دنیا بھر میں کمپنیاں اپنے ملازمین کی صحت اور کارکردگی بہتر بنانے کے لیے مختلف اقدامات کر رہی ہیں، تاہم جاپان کی ایک کمپنی نے ایک منفرد پالیسی متعارف کرا کے عالمی توجہ حاصل کر لی ہے۔
جاپانی کمپنی پیالا انک نے سگریٹ نوشی نہ کرنے والے ملازمین کو ہر سال 6 اضافی چھٹیاں دینے کا فیصلہ کیا، جس کا مقصد ملازمین کے درمیان مساوات قائم کرنا اور صحت مند طرزِ زندگی کو فروغ دینا ہے۔رپورٹس کے مطابق کمپنی نے یہ پالیسی 2017 میں اس وقت متعارف کرائی جب بعض ملازمین نے شکایت کی کہ سگریٹ نوشی کرنے والے ساتھی دورانِ کام متعدد بار سگریٹ پینے کے لیے وقفے لیتے ہیں، جس سے نہ صرف ان کے کام کے اوقات متاثر ہوتے ہیں بلکہ دیگر ملازمین پر اضافی ذمہ داریاں بھی عائد ہو جاتی ہیں،شکایات موصول ہونے کے بعد کمپنی انتظامیہ نے ملازمین کے درمیان سروے کروایا۔ سروے کے نتائج کی روشنی میں کمپنی کے چیف ایگزیکٹو آفیسر نے سگریٹ نوشی نہ کرنے والے ملازمین کو سالانہ 6 اضافی دنوں کی چھٹی دینے کا اعلان کیا۔
کمپنی کا کہنا ہے کہ اس اقدام سے نہ صرف ملازمین کے درمیان توازن پیدا ہوگا بلکہ غیر تمباکو نوش ملازمین کو بھی اپنے وقت کے بہتر استعمال کا موقع ملے گا۔ اس پالیسی کا ایک اہم مقصد ملازمین کو سگریٹ نوشی ترک کرنے کی ترغیب دینا بھی تھا،اطلاعات کے مطابق اضافی چھٹیوں کے اعلان کے بعد کئی ملازمین نے سگریٹ نوشی چھوڑنے یا اس میں کمی لانے کی کوشش شروع کر دی، جبکہ بعض افراد نے مستقل طور پر تمباکو نوشی ترک بھی کر دی۔
ماہرین صحت کے مطابق سگریٹ نوشی نہ صرف انسانی صحت کے لیے نقصان دہ ہے بلکہ کام کی جگہ پر پیداواری صلاحیت میں بھی کمی کا باعث بن سکتی ہے۔ بار بار سگریٹ نوشی کے وقفے مجموعی کام کے اوقات کو متاثر کرتے ہیں، جس سے اداروں کی کارکردگی پر منفی اثر پڑ سکتا ہے،جاپان میں اس منفرد اقدام کے بعد دنیا بھر کی متعدد کمپنیوں نے بھی صحت مند طرزِ زندگی کو فروغ دینے کے لیے مختلف مراعات متعارف کرانا شروع کر دی ہیں۔ بعض ادارے ملازمین کو فٹنس بونس فراہم کر رہے ہیں جبکہ کچھ کمپنیاں صحت سے متعلق اہداف حاصل کرنے پر اضافی سہولیات اور مراعات دے رہی ہیں۔