اوکاڑہ (نامہ نگارملک ظفر)اوکاڑہ پولیس نے جدید ٹیکنالوجی کی مدد سے کارروائی کرتے ہوئے خطرناک چور گینگ کے چار ملزمان کو گرفتار کر لیا، جو مختلف مقدمات میں اشتہاری بھی نکلے۔ پولیس نے ملزمان کے قبضے سے بھاری مالِ مسروقہ اور اسلحہ بھی برآمد کر لیا۔
پولیس ترجمان کے مطابق تھانہ صدر دیپالپور پولیس نے ڈی پی او اوکاڑہ کے خصوصی ٹاسک پر کامیاب کارروائی کی۔ گرفتار ملزمان میں سلیم، تنویر، علی ارشد اور عامر شامل ہیں، جو ایک منظم چور گینگ کے ارکان ہیں اور متعدد مقدمات میں مطلوب تھے۔
ملزمان نے دورانِ تفتیش 10 بکریاں، ایک ٹوکہ مشین اور ایک بجلی کی موٹر چوری کرنے کی وارداتوں کا انکشاف کیا۔ پولیس نے ان کے قبضے سے چار عدد 30 بور پسٹل اور گولیاں بھی برآمد کیں، جبکہ اسلحہ برآمدگی پر ملزمان کے خلاف الگ مقدمات درج کر لیے گئے ہیں۔
پولیس کے مطابق ملزمان سے مزید تفتیش جاری ہے اور مزید مالِ مسروقہ کی برآمدگی کی توقع ہے۔