اوکاڑہ (نامہ نگار ملک ظفر)اوکاڑہ پولیس تھانہ اے ڈویژن نے سخت سرد موسم اور شدید دھند کے باوجود اپنے فرائض کو اولین ترجیح دیتے ہوئے چند ہی گھنٹوں میں 10 سالہ بچے کو بازیاب کرا کے والدین کے حوالے کر دیا۔
تفصیلات کے مطابق پکار 15 پر گورنمنٹ کالونی، نزد ٹینکی چوک سے ایک بچے کے اغواء کی اطلاع موصول ہوئی۔ اطلاع ملتے ہی ایس ایچ او تھانہ اے ڈویژن جہانزیب وٹو نے موسم کی سختی کی پرواہ کیے بغیر اپنی ٹیم کے ہمراہ فوری کارروائی کا آغاز کیا۔
پولیس نے سیف سٹی کیمروں، مختلف مقامات پر نصب سی سی ٹی وی کیمروں، ہیومن انٹیلی جنس اور جدید ٹیکنالوجی کی مدد سے مؤثر سرچ آپریشن کیا، جس کے نتیجے میں چند ہی گھنٹوں میں 10 سالہ نوریز نواز کو تلاش کر کے بحفاظت والدین کے حوالے کر دیا گیا۔
بچے کی بحفاظت بازیابی پر اہلِ خانہ نے تھانہ اے ڈویژن پولیس کی پیشہ ورانہ کارکردگی اور فوری ردِعمل کو سراہتے ہوئے ایس ایچ او جہانزیب وٹو اور ان کی ٹیم کا شکریہ ادا کیا اور ان کے لیے دعائیں کیں۔