اوکاڑہ (نامہ نگار ملک ظفر) ڈی پی او اوکاڑہ محمد راشد ہدایت نے مسجد شرطہ ڈسٹرکٹ کمپلیکس میں کھلی کچہری کا انعقاد کیا، جس میں ضلع بھر سے آئے ہوئے شہریوں نے اپنے مسائل اور شکایات پیش کیں۔ ڈی پی او نے عوامی مسائل توجہ سے سنے اور متعلقہ افسران کو موقع پر ہی فوری اور مؤثر کارروائی کی ہدایات جاری کیں تاکہ شہریوں کو بروقت انصاف اور ریلیف فراہم کیا جا سکے۔
کھلی کچہری سے خطاب کرتے ہوئے ڈی پی او محمد راشد ہدایت نے کہا کہ احتساب کا آغاز خود سے ہوتا ہے اور ہر فرد کو اپنی ذمہ داریوں کا احساس ہونا چاہیے۔ انہوں نے کہا کہ نظم و ضبط، قانون کی پاسداری اور مثبت طرزِ عمل ہی ایک پرامن اور ترقی یافتہ معاشرے کی بنیاد ہیں۔
ڈی پی او نے پولیس افسران کو ہدایت کی کہ وہ عوام کے ساتھ خوش اخلاقی، شفافیت اور میرٹ کو یقینی بناتے ہوئے اپنے فرائض سرانجام دیں اور شہریوں کے مسائل کے حل کو اپنی اولین ترجیح بنائیں۔