اوکاڑہ (نامہ نگار ملک ظفر) ڈپٹی کمشنر احمد عثمان جاوید کی ہدایات پر ضلع بھر میں جاری میٹرک کے سالانہ امتحانات کی شفافیت کو یقینی بنانے کے لیے ضلعی انتظامیہ اور ایجوکیشن افسران متحرک ہو گئے۔ اس سلسلے میں ایڈیشنل ڈپٹی کمشنرز، اسسٹنٹ کمشنرز اور متعلقہ تعلیمی افسران نے مختلف امتحانی مراکز کے اچانک دورے کیے اور امتحانی عمل کی سخت نگرانی کی۔
دوروں کے دوران امتحانی مراکز میں دفعہ 144 کے نفاذ، سکیورٹی انتظامات اور امیدواروں کو فراہم کی جانے والی سہولیات کا تفصیلی جائزہ لیا گیا۔ حکام نے اس بات کو یقینی بنایا کہ امتحانی مراکز کے اردگرد غیر متعلقہ افراد کا داخلہ مکمل طور پر بند ہو اور کسی بھی قسم کی مداخلت نہ ہو۔
ڈپٹی کمشنر احمد عثمان جاوید نے واضح کیا کہ امتحانی عمل میں کسی قسم کی بدعنوانی یا بوٹی مافیا کو ہرگز برداشت نہیں کیا جائے گا، اور خلاف ورزی کرنے والوں کے خلاف فوری اور سخت کارروائی عمل میں لائی جائے گی۔ انہوں نے نگران عملے کی حاضری اور کارکردگی کو مسلسل مانیٹر کرنے کی بھی ہدایت کی۔
مزید برآں انہوں نے امتحانی مراکز میں طلبہ کے لیے صاف پینے کے پانی، بجلی کی بلا تعطل فراہمی، آرام دہ نشستوں اور مناسب روشنی کے انتظامات کو یقینی بنانے پر زور دیا۔
ڈپٹی کمشنر کا کہنا تھا کہ ان اقدامات کا مقصد میرٹ کی بالادستی کو قائم رکھنا اور ایک شفاف تعلیمی نظام کو فروغ دینا ہے۔ انہوں نے والدین اور اساتذہ سے بھی اپیل کی کہ وہ انتظامیہ کے ساتھ مکمل تعاون کریں تاکہ امتحانی نظام کو صاف اور شفاف بنایا جا سکے۔