اوکاڑہ (نامہ نگار ملک ظفر) دن ہو یا رات، آندھی ہو یا طوفان، حادثہ ہو یا سانحہ، زلزلہ ہو یا آگہر دم تیار کے ماٹو پر کام کرنے والے ادارے ریسکیو 1122 اوکاڑہ نے سال 2025 کی سالانہ کارکردگی رپورٹ جاری کر دی۔ ڈسٹرکٹ ایمرجنسی آفیسر ظفر اقبال نے رپورٹ جاری کرتے ہوئے بتایا کہ سال 2025 کے دوران اوکاڑہ میں 45 ہزار 301 ایمرجنسیز پر مجموعی طور پر 47 ہزار 692 افراد کو ریسکیو سروسز فراہم کی گئیں۔
رپورٹ کے مطابق ان ایمرجنسیز میں 7 ہزار 963 روڈ ٹریفک حادثات، 31 ہزار 992 میڈیکل ایمرجنسیز، 346 فائر ایمرجنسیز، 918 کرائم ایمرجنسیز، 5 پانی میں ڈوبنے کے واقعات اور 4 ہزار 43 دیگر نوعیت کی ایمرجنسیز شامل تھیں۔ ضلع بھر میں مجموعی طور پر 13 ہزار 729 روڈ ٹریفک حادثات پیش آئے جن میں 16 ہزار 235 افراد متاثر ہوئے، جبکہ 181 افراد موقع پر جان کی بازی ہار گئے۔ 7 ہزار 97 شدید زخمیوں کو ابتدائی طبی امداد فراہم کرنے کے بعد قریبی ہسپتالوں میں منتقل کیا گیا۔
ڈسٹرکٹ ایمرجنسی آفیسر ظفر اقبال کی قیادت میں ریسکیو 1122 اوکاڑہ نے سپر فلڈ 2025 کے دوران بھی مثالی کارکردگی کا مظاہرہ کیا۔ دریائے ستلج اور راوی میں سیلاب کی وارننگ ملنے پر 23 ہزار 446 افراد کو بروقت محفوظ مقامات پر منتقل کیا گیا۔ ریسکیو آپریشن کے دوران 15 ہزار 991 افراد کو 3 ہزار 609 چھوٹے جانوروں سمیت کشتیوں کے ذریعے محفوظ مقامات تک پہنچایا گیا، جبکہ ریلیف آپریشن کے تحت 9 ہزار 496 افراد کو ٹرانسپورٹیشن کی سہولت بھی فراہم کی گئی۔
ڈسٹرکٹ ایمرجنسی آفیسر ظفر اقبال نے ریسکیو اہلکاروں کی شبانہ روز محنت کو سراہتے ہوئے کہا کہ ریسکیو 1122 اوکاڑہ نے ہر مشکل گھڑی میں عوام کی خدمت کو اپنی اولین ترجیح بنایا اور آئندہ بھی اسی جذبے کے ساتھ اپنی ذمہ داریاں نبھاتا رہے گا۔