اوکاڑہ (نامہ نگار: ملک ظفر)ایڈیشنل ڈپٹی کمشنر اوکاڑہ احمد سلیم چشتی نے اسسٹنٹ کمشنر احمد شیر گوندل کے ہمراہ ڈی ایچ کیو سٹی ہسپتال کا دورہ کیا اور مریضوں کو فراہم کی جانے والی طبی سہولیات کا تفصیلی جائزہ لیا۔
دورے کے دوران انہوں نے مختلف وارڈز، ایمرجنسی، لیبارٹری، ادویات کی دستیابی اور صفائی ستھرائی کے انتظامات کا معائنہ کیا، جبکہ مریضوں اور ان کے لواحقین سے سہولیات سے متعلق براہِ راست دریافت بھی کی۔
اس موقع پر ایڈیشنل ڈپٹی کمشنر احمد سلیم چشتی نے ہسپتال انتظامیہ کو ہدایت کی کہ مریضوں کو معیاری اور بروقت طبی سہولیات کی فراہمی کے لیے مؤثر اقدامات کا سلسلہ تسلسل کے ساتھ جاری رکھا جائے۔ انہوں نے واضح کیا کہ سرکاری ہسپتالوں میں علاج معالجہ عوام کا بنیادی حق ہے اور اس ضمن میں کسی قسم کی کوتاہی ہرگز برداشت نہیں کی جائے گی۔
انہوں نے ڈاکٹرز اور پیرا میڈیکل اسٹاف کی حاضری، صفائی ستھرائی کے معیار، ادویات کی بروقت دستیابی اور ایمرجنسی سروسز کو مزید بہتر بنانے پر بھی زور دیا۔ دورے کے اختتام پر ایڈیشنل ڈپٹی کمشنر احمد سلیم چشتی نے ہسپتال میں مریضوں کو فراہم کی جانے والی مجموعی طبی سہولیات پر اطمینان کا اظہار کیا۔