آپریشن غضب للحق کے تحت پاک افواج کی جانب سے افغان طالبان اور فتنہ الخوارج کے خلاف کارروائیاں بدستور جاری ہیں، جن میں حالیہ دنوں میں شدت دیکھنے میں آئی ہے۔
سکیورٹی ذرائع کے مطابق طورخم سیکٹر میں پاک فوج نے ایک اہم کارروائی کرتے ہوئے افغان طالبان کی ایک پوسٹ کو نشانہ بنایا، جس کے نتیجے میں مذکورہ پوسٹ مکمل طور پر تباہ ہوگئی۔
ذرائع کا کہنا ہے کہ یہ کارروائیاں مخصوص اہداف کے حصول کے لیے کی جا رہی ہیں اور پاک افواج اس وقت تک اپنے حملے جاری رکھیں گی جب تک دہشت گرد عناصر اور ان کے ٹھکانوں کو مکمل طور پر ختم نہیں کر دیا جاتا۔
اس سے قبل 16 مارچ کی شب بھی پاک افواج نے افغانستان کے مختلف علاقوں میں کارروائیاں کیں، جن میں کابل اور ننگرہار شامل ہیں۔ ان حملوں کے دوران افغان طالبان کی فوجی تنصیبات کو نشانہ بنایا گیا۔
سکیورٹی ذرائع کے مطابق ان کارروائیوں میں کابل کے دو مختلف مقامات پر موجود ٹیکنیکل سپورٹ انفراسٹرکچر اور اسلحہ ذخیرہ کرنے کی جگہوں کو مؤثر انداز میں تباہ کیا گیا، جس سے دشمن کی صلاحیت کو شدید نقصان پہنچا۔
آپریشن غضب للحق: پاک افواج کی طورخم سمیت افغان طالبان کے خلاف کارروائیاں تیز
