اسلام آباد: پاکستانی پاسپورٹ کی عالمی درجہ بندی میں خوش آئند بہتری سامنے آئی ہے، جس کے تحت پاکستان کا پاسپورٹ 126 ویں نمبر سے ترقی کرتے ہوئے 98 ویں پوزیشن پر پہنچ گیا ہے۔ اس پیش رفت کو عالمی سطح پر پاکستان پر بڑھتے ہوئے اعتماد کی علامت قرار دیا جا رہا ہے۔
وفاقی وزیر داخلہ محسن نقوی نے اس کامیابی پر اظہارِ اطمینان کرتے ہوئے کہا کہ شاندار کارکردگی اور مؤثر اصلاحاتی اقدامات کے باعث پاکستانی پاسپورٹ کی عالمی رینکنگ میں نمایاں بہتری ممکن ہوئی ہے۔ ان کا کہنا تھا کہ یہ پیش رفت وزارت داخلہ اور متعلقہ اداروں کی مشترکہ کاوشوں کا نتیجہ ہے، جس میں پاسپورٹ کے اجرا کے نظام کو بہتر بنانا، سیکیورٹی فیچرز کو جدید بنانا اور بین الاقوامی معیار کے مطابق اقدامات شامل ہیں۔محسن نقوی نے مزید کہا کہ عالمی درجہ بندی میں تیزی سے بہتری اس بات کا ثبوت ہے کہ دنیا بھر میں پاکستان پر اعتماد میں اضافہ ہو رہا ہے۔ انہوں نے واضح کیا کہ حکومت اس ترقی کے سفر کو مزید آگے بڑھانے کے لیے پرعزم ہے اور مستقبل میں پاکستانی شہریوں کو مزید سفری سہولیات فراہم کرنے کے لیے اصلاحات کا سلسلہ جاری رکھا جائے گا۔
وزیر داخلہ کے مطابق جدید ٹیکنالوجی کے استعمال، بایومیٹرک نظام کی بہتری اور پاسپورٹ آفسز میں سہولیات کی فراہمی نے نہ صرف درخواستوں کے بروقت اجرا کو ممکن بنایا بلکہ عالمی اداروں کے اعتماد میں بھی اضافہ کیا۔ انہوں نے کہا کہ حکومت کا ہدف پاکستانی پاسپورٹ کو مزید مضبوط اور باوقار بنانا ہے تاکہ بیرون ملک سفر کرنے والے پاکستانی شہریوں کو آسانیاں میسر آئیں۔