پاکستانی معیشت میں بہتری کا رجحان، خطرات اب بھی موجود، ایشیائی ترقیاتی بینک رپورٹ

اسلام آباد: ایشین ڈویلپمنٹ بینک (اے ڈی بی) نے پاکستان کی معاشی صورتحال پر تازہ رپورٹ جاری کر دی ہے، جس میں معیشت میں بتدریج بہتری کی نشاندہی کی گئی ہے، تاہم مختلف اندرونی و بیرونی خطرات بدستور برقرار ہیں۔

رپورٹ کے مطابق پاکستان کی معیشت رواں مالی سال کے دوران 3.5 فیصد کی شرح سے بڑھنے کا امکان ہے، جبکہ آئندہ مالی سال میں یہ شرح بڑھ کر 4.5 فیصد تک پہنچ سکتی ہے۔اے ڈی بی نے خبردار کیا ہے کہ مشرق وسطیٰ میں جاری کشیدگی پاکستان کی معیشت پر اثر انداز ہو سکتی ہے، جس کے نتیجے میں مہنگائی میں اضافہ اور معاشی دباؤ بڑھنے کا خدشہ ہے۔ رپورٹ میں بتایا گیا ہے کہ مالی سال 2026 میں مہنگائی کی شرح 6.4 فیصد رہنے کا امکان ہے، جبکہ 2027 میں یہ بڑھ کر 6.5 فیصد تک جا سکتی ہے۔رپورٹ میں تیل اور گیس کی عالمی قیمتوں میں اضافے کو پاکستانی معیشت کے لیے ایک بڑا خطرہ قرار دیا گیا ہے، اور اس بات پر زور دیا گیا ہے کہ بیرونی معاشی جھٹکوں سے نمٹنے کے لیے اصلاحات کا تسلسل نہایت ضروری ہے۔ ساتھ ہی نجی سرمایہ کاری میں اضافے کو معیشت کے استحکام کے لیے اہم قرار دیا گیا ہے۔اے ڈی بی کے مطابق تعمیراتی شعبے اور صنعتی پیداوار میں بہتری کی توقع ہے، جبکہ اسٹیٹ بینک آف پاکستان سے محتاط مانیٹری پالیسی میں نرمی کی بھی توقع ظاہر کی گئی ہے۔