بھارتی اخبار فرسٹ پوسٹ نے خلیج میں جاری کشیدگی کے خاتمے میں پاکستان کے کردار کو تسلیم کرتے ہوئے کہا ہے کہ متعدد اہم ممالک نے پاکستان کی سفارتی کوششوں کو سراہا ہے۔
رپورٹ کے مطابق مصر، ترکیے اور سعودی عرب نے امریکا اور ایران کے درمیان رابطوں میں پاکستان کے کردار کو مثبت قرار دیا اور اسے ایک اہم پیش رفت کے طور پر دیکھا جا رہا ہے۔
فرسٹ پوسٹ کا کہنا ہے کہ چار ممالک کے وزرائے خارجہ کے اجلاس کے بعد پاکستان کو ایک بڑی سفارتی کامیابی حاصل ہوئی ہے، جس سے خطے میں اس کی اہمیت مزید بڑھ گئی ہے۔
رپورٹ میں یہ بھی بتایا گیا کہ ایران نے پاکستانی جہازوں کو آبنائے ہرمز سے گزرنے کی اجازت دے کر پاکستان پر اعتماد کا اظہار کیا ہے، جو دونوں ممالک کے درمیان بہتر تعلقات کی نشاندہی کرتا ہے۔
ماہرین کے مطابق پاکستان کی جانب سے کشیدگی کم کرنے کی کوششیں خطے میں امن کے قیام کے لیے اہم ثابت ہو سکتی ہیں اور اس سے عالمی سطح پر پاکستان کی سفارتی ساکھ میں اضافہ ہوا ہے۔
یہ پیش رفت ایسے وقت میں سامنے آئی ہے جب مشرقِ وسطیٰ میں کشیدگی عروج پر ہے اور مختلف ممالک تنازع کو کم کرنے کے لیے کردار ادا کر رہے ہیں۔
خلیجی کشیدگی میں پاکستان کا کردار، بھارت کا عالمی سطح پر اعتراف
