پاکستان ہاکی فیڈریشن (پاکستان ہاکی فیڈریشن) کے تنازع کے بعد قومی ہاکی ٹیم کے کپتان عماد بٹ پر عائد دو سالہ پابندی صرف ایک روز میں ختم کر دی گئی۔ یہ فیصلہ ہاکی پرو لیگ کے لیے آسٹریلیا کے دورے کے دوران کھلاڑیوں اور پی ایچ ایف کے درمیان پیدا ہونے والے اختلافات کے تناظر میں سامنے آیا۔
پابندی کے خاتمے کا اعلان فیڈریشن کے نئے ایڈہاک صدر محی الدین احمد وانی نے کیا۔ انہوں نے میڈیا سے گفتگو میں کہا کہ پابندی فوری طور پر ختم کی گئی ہے اور پی ایچ ایف میں اعتماد کی بحالی، ٹیم منیجمنٹ کی ازسرنو تشکیل اور شفاف، جمہوری انتخابات کرائے جائیں گے۔
محی الدین وانی نے کہا کہ تمام ادارے قومی ہاکی کی بحالی کے لیے یکسو ہیں اور کھلاڑی اپنی تربیت اور میچز پر توجہ مرکوز کریں گے، جبکہ انتظامیہ فیڈریشن کے امور سنبھالے گی۔ انہوں نے مزید کہا کہ گورننس میں بہتری، شفافیت اور وسائل کے مؤثر استعمال کو یقینی بنایا جائے گا اور نجی شعبے کے ساتھ شراکت داری کے ذریعے کھلاڑیوں کی معاونت بھی کی جائے گی۔
واضح رہے کہ گزشتہ روز پی ایچ ایف کے صدر طارق بگٹی نے استعفیٰ دینے سے قبل کپتان عماد بٹ پر دو سالہ پابندی عائد کی تھی، جس کے تحت انہیں بین الاقوامی اور مقامی ہاکی مقابلوں میں شرکت سے روک دیا گیا تھا۔ طارق بگٹی نے الزام لگایا تھا کہ عماد بٹ اور چند کھلاڑی پی ایچ ایف کی ساکھ کو نقصان پہنچا رہے ہیں اور "سیاست” کر رہے ہیں۔
پی ایچ ایف تنازع کے بعد عماد بٹ پر لگائی گئی پابندی ایک روز میں ختم
