وزیراعظم شہباز شریف نے حکام کو ہدایت دی ہے کہ ملک میں پیٹرولیم مصنوعات کی قیمتوں میں حالیہ اضافے کے اثرات سے عوام کو بچانے کے لیے سبسڈی کی ادائیگیاں فوری طور پر جاری کی جائیں۔
یہ ہدایات ایک اعلیٰ سطح اجلاس کے دوران دی گئیں جس میں وفاقی وزرا اور سینئر حکام نے شرکت کی اور پیٹرولیم مصنوعات پر دی جانے والی سبسڈی کے اجرا کی پیش رفت کا جائزہ لیا گیا۔ وزیراعظم آفس کے مطابق سبسڈی کی ادائیگیوں کا آغاز ہو چکا ہے اور اسے مزید تیز کرنے کی ہدایت دی گئی ہے۔
واضح رہے کہ مشرقِ وسطیٰ میں جاری کشیدگی کے باعث عالمی سطح پر تیل کی قیمتوں میں اضافہ ہوا، جس کے اثرات پاکستان پر بھی پڑے۔ حکومت نے حال ہی میں پیٹرول کی قیمت میں 137 روپے سے زائد اضافہ کیا تھا، تاہم عوامی ردعمل کے بعد اس میں 80 روپے کمی کر دی گئی، جس کے بعد نئی قیمت 378 روپے فی لیٹر مقرر کی گئی۔
حکومت نے عوام کو ریلیف دینے کے لیے مختلف اقدامات کا اعلان بھی کیا ہے، جن میں اسلام آباد میں مفت پبلک ٹرانسپورٹ، ریلوے کرایوں کو برقرار رکھنا، اور ٹرانسپورٹرز، کسانوں اور موٹر سائیکل سواروں کے لیے ہدفی سبسڈیز شامل ہیں۔
وزیراعظم کے مطابق مسافر بسوں کو کرایے نہ بڑھانے کے لیے ماہانہ ایک لاکھ روپے سبسڈی دی جا رہی ہے جبکہ منی بسوں اور وینز کو 40 ہزار روپے ماہانہ فراہم کیے جا رہے ہیں۔
حکومت کا کہنا ہے کہ موجودہ مشکل حالات میں عوام کو ریلیف دینا اولین ترجیح ہے اور اس مقصد کے لیے ہر ممکن اقدامات کیے جا رہے ہیں۔
عوام کو فوری ریلیف، وزیراعظم کی سبسڈی ادائیگیاں تیز کرنے کی ہدایت
