وزیر اعلی پنجاب کے موجودہ ایم پی اے ثاقب چدھڑ قبضہ مافیا نکلے ،ایم پی اے ثاقب چدھڑ نے وزیر اعلی پنجاب کی ریڈ لائن کراس کر دی ،ڈیوس روڈ پر اربوں روپے کی اراضی فراڈ سے بیوہ خاتون سے ہتھیا لی گئی ،ملزم نے 60 کروڑ روپے مالیت کا پلاٹ خریدا، 16 کروڑ روپے ادا کیے، باقی رقم کی ادائیگی سے انکاری ،دیے گئے چیک کے ڈس آنر ہونے پر ضعیف العمر بیوہ و بیمار خاتون کی درخواست پر تھانہ ڈیفنس اے بلاک لاہور نے مقدمہ درج کر لیا۔
لاہور کے علاقے ڈیفنس اے میں 10 کروڑ روپے مالیت کا چیک ڈس آنر ہونے اوردھوکہ دہی کے الزام میں ن لیگی رکن اسمبلی ثاقب چدھڑ سمیت دو افراد کے خلاف مقدمہ درج کر لیا گیا ہے۔پولیس کے مطابق مقدمہ خاتون ماہ روح عارف علی کی درخواست پر زیر دفعہ 489-F تعزیراتِ پاکستان کے تحت درج کیا گیا۔ درخواست گزار نے مؤقف اختیار کیا کہ وہ ضعیف العمر ہیں اور کینسر کے آخری مرحلے میں مبتلا ہیں،انہوں نے اپنی ملکیتی جائیداد، جو ڈیوس روڈ لاہور پر واقع ہے، 60 کروڑ روپے میں محمد ثاقب خان،(ثاقب چدھڑ) اور زوہیر اکبر کے ہاتھ فروخت کرنے کا معاہدہ کیا تھا، جس کے تحت 16 کروڑ روپے بطور بیعانہ وصول کیے گئے۔ ملزمان نے اعتماد میں لے کر جائیداد سے متعلق دستاویزات پر دستخط اور انگوٹھے لگوائے، جبکہ ادائیگی کے لیے دیے گئے چیکس میں سے 10 کروڑ روپے مالیت کا ایک چیک مقررہ تاریخ پر بینک میں پیش کرنے پر اکاؤنٹ میں رقم نہ ہونے کے باعث ڈس آنر ہوگیا۔چیک کی واپسی کے بعد ملزمان سے متعدد بار رابطہ کیا گیا، تاہم وہ مختلف حیلے بہانوں سے ٹالتے رہے اور بالآخر رقم کی ادائیگی سے انکار کر دیا۔ ملزمان کو گرفتار کرکے مبینہ طور پر تیار کیا گیا بوگس بیع نامہ برآمد کیا جائے، جائیداد کا قبضہ واپس دلایا جائے اور ذمہ داران کے خلاف قانونی کارروائی عمل میں لائی جائے۔
